Ved kommune- og fylkeskommunesamanslåing kan kommunen anten

• opprette eit nytt juridisk organisasjonsnummer (opplysningspliktig) for den nyoppretta kommunen. Verksemder/undereiningar frå eksisterande kommunar skal knytast opp mot det nye juridiske organisasjonsnummeret, eller
• behalde det juridiske organisasjonsnummeret (opplysningspliktig) og ta over verksemder/undereiningar til ein eller fleire kommunar som skal leggjast ned.

Statistisk Sentralbyrå har laga ei rettleiing til kommunar som slår seg saman. Rettleiinga ligg på nettsidene til Kartverket.

 

Kva du må gjøre når ein nyoppretta kommune får nytt juridisk organisasjonsnummer

Ved samanslåing må

1. eksisterande kommunar oppgi sluttdato
2. nyoppretta kommunar oppgi startdato

 

Eksisterande kommunar oppgir sluttdato

Skal du sende a-melding for kommunane som skal slå seg saman, må du avslutte alle arbeidsforhold. Dette gjer du ved å setje sluttdato for arbeidsforholda hjå den eksisterande opplysningspliktige.

Du bør ikkje setje sluttdato for eksisterande arbeidsforhold før den nyoppretta kommunen har rapportert arbeidsforholda i a-meldinga.

 

 

Nyoppretta kommunar oppgir startdato

Dersom du skal sende a-melding for ein nyoppretta kommune, må du oppgi alle arbeidsforholda på nytt med ny startdato. Dette gjer du etter at verksemdene/undereiningane er knytte opp mot den nyoppretta kommunen i Einingsregisteret. 

Du bør oppgi arbeidsforholda før dei eksisterande kommunane set sluttdato. Oppgi arbeidsforholda i a-meldinga så tidleg som mogeleg i månaden, slik at arbeidstakarane ikkje blir ståande utan arbeidsforhold.

Merk!
Den nye startdatoen på arbeidsforholda må vere dagen etter sluttdato for at det skal bli riktige i Aa-registeret. Til dømes sluttdato 31. desember og startdato 1. januar.

 

 

Kva må du gjere når kommunen beheld juridiske organisasjonsnummer og tek over verksemda/undereininga i ein nedlagd kommune

Ved samanslåing må

1. nedlagde kommunar oppgi sluttdato på arbeidsforholda
2. overtakande kommunar oppgi startdato på dei nye arbeidsforholda

 

Nedlagde kommunar oppgir sluttdato på arbeidsforholda

Som nedlagd kommune må du oppgi sluttdato på alle arbeidsforhold.

 

 

Overtakande kommunar oppgir startdato på dei nye arbeidsforholda

Som overtakande kommune må du oppgi arbeidsforhold for alle tilsette som du tek over arbeidsgivaransvaret for. Du finn utfyllande informasjon om kva for opplysningar du skal oppgi, ved å sjå på dei ulike typane arbeidsforhold.

Merk!
Den nye startdatoen på arbeidsforholdet må vere dagen etter sluttdato for at det skal bli riktige opplysningar i Aa-registeret i NAV. Til dømes sluttdato 31. desember og startdato 1. januar.