Juridisk organisasjonsnummer (opplysningspliktig) og organisasjonsnummer for verksemder
Kva for organisasjonsnummer du skal bruke i a-meldinga.
Bruk to nummer for å identifisere den du sender a-melding for
I a-meldinga skal du identifisere den du sender a-melding for ved å føre opp juridisk organisasjonsnummer.
Dersom du har tilsette, skal du òg oppgi organisasjonsnummer for verksemda, også kalla verksemdsnummer.
Juridisk organisasjonsnummer
Før opp det juridiske organisasjonsnummeret til hovudeininga for å identifisere den du sender a-melding for. Gjeld òg enkeltpersonføretak.
Alle føretak og foreiningar som registrerer seg i Einingsregisteret får tildelt eit juridisk organisasjonsnummer. Den eininga ein identifiserer med juridisk organisasjonsnummer, kallar vi hovudeininga. Det er hovudeininga som er opplysningspliktig i a-meldinga.
Har du ikkje juridisk organisasjonsnummer? Sjå brreg.no og på altinn.no viss du ønskjer meir informasjon og søknadsskjema.
Privatpersonar skal bruke fødselsnummer
Dersom du sender a-melding som privatperson, skal du bruke fødselsnummer for å identifisere den opplysningspliktige.
Organisasjonsnummer for verksemder (verksemdsnummer)
Før opp organisasjonsnummer for verksemda og knyt dei tilsette til den verksemda der dei jobbar.
Alle som driv næringsverksemd og/eller har tilsette, må ha minst ei verksemd, identifisert med eit organisasjonsnummer for verksemder. Ei verksemd er ikkje sjølvstendig. Ho kjem alltid til å vere knytt opp mot ei hovudeining. Under ei hovudeining kan det vere ei eller fleire verksemder.
Pass på at registreringa i Einingsregisteret er rett, og rapporter etter den same strukturen i a-meldingane. Registrer verksemda i Einingsregisteret før du sender a-melding.
Har du ikkje organisasjonsnummer for verksemda? Sjå brreg.no og på altinn.no viss du ønskjer meir informasjon og søknadsskjema.
Ikkje fått organisasjonsnummer for verksemd enda
Dersom du har søkt om organisasjonsnummer for verksemda i Einingsregisteret og ikkje har fått dette før du pliktar å sende a-melding, kan du bruke det juridiske organisasjonsnummeret i staden.
Når du har fått organisasjonsnummer for verksemda, skal du bruke det.
Døme med éi verksemd
Ein frisørsalong som skal drive verksemd i Bodø har registrert seg i Einingsregisteret. Dei har fått eit juridisk organisasjonsnummer og eit organisasjonsnummer for verksemda i Bodø.
Frisørsalongen oppgir juridisk organisasjonsnummer for å identifisere den opplysningspliktige i a-meldinga.
I tillegg fører dei opp organisasjonsnummer for verksemda i Bodø og knyter opplysningar om dei tilsette til dette nummeret.
Døme med fleire verksemder
Ei røyrleggjarbedrift som skal drive verksemd i både Oslo og Hamar har registrert seg i Einingsregisteret. Dei har fått tildelt juridisk organisasjonsnummer og to organisasjonsnummer for verksemd, eitt for Oslo og eitt for Hamar.
Røyrleggjarbedrifta oppgir juridisk organisasjonsnummer for å identifisere den opplysningspliktige når dei sender a-melding for Oslo og Hamar.
I tillegg fører dei opp organisasjonsnummer for verksemda i Oslo og knyter opplysningar om dei tilsette i Oslo til dette nummeret.
Tilsvarande fører dei opp organisasjonsnummer for verksemda i Hamar og knyter opplysningar om dei tilsette i Hamar til dette nummeret.
Røyrleggjarbedrifta rapporterer begge verksemdene i den same a-meldinga (tilrådd). Dei kan òg rapportere verksemda i Oslo i éi a-melding og verksemda i Hamar i ei anna a-melding.
Organisasjonsnummer og arbeidsforhold ved fusjon, fisjon o.l
Oppkjøp, eigarskifte eller overdraging av verksemd
Rette feil
Har du fått feilmelding (MAGNET/EDAG)
| Feilmeldingar som gjeld juridisk organisasjonsnummer |
| MAGNET-000005 Ugyldig identifikator for opplysningspliktig |
| MAGNET-000096 Ugyldig identifikator for opplysningspliktig |
| MAGNET_EDAG-109A Avvik frå opplysningar i Einingsregisteret |
| MAGNET_EDAG-182 Opplysningspliktig sitt organisasjonsnummer i a-meldinga er ulikt organisasjonsnummeret det er rapportert for i Altinn |
| Feilmeldingar som gjeld organisasjonsnummer for verksemd |
| MAGNET_EDAG-107B Ugyldig identifikator for verksemd |
| MAGNET_EDAG-142 Informasjonen i meldinga stemmer ikkje overeins med informasjonen i Enhetsregisteret |
| MAGNET_EDAG-142B Informasjonen i meldinga stemmer ikkje overeins med informasjonen i Enhetsregisteret |
| MAGNET_EDAG-142C Informasjonen i meldinga stemmer ikkje overeins med informasjonen i Enhetsregisteret |
| MAGNET_EDAG-196 Informasjonen i meldinga stemmer ikkje overeins med informasjonen i Enhetsregisteret |
| MAGNET_EDAG-255 Feil rapportering av verksemd |
Har du ikkje fått feilmelding
Feil som gjeld juridisk organisasjonsnummer
Dersom du har oppgitt feil juridisk organisasjonsnummer, men ikkje fått feilmelding på dette i tilbakemelding (A03), må du slette alle opplysningane du har sendt inn på dette nummeret.
Det gjer du ved å sende ei erstatningsmelding med tomt innhald. I tillegg må du sende inn opplysningane på korrekt juridisk organisasjonsnummer.
Døme på bruk av feil organisasjonsnummer
Kari brukte ved ein feil sitt eige fødselsnummer, i staden for juridisk organisasjonsnummer, då ho sende a-melding.
For å rette opp sender Kari først ei tom a-melding på fødselsnummeret for å erstatte a-meldinga som blei send på feil nummer.
Deretter sender ho ei ny a-melding med juridisk organisasjonsnummer til hovudeininga ho skal rapportere for.
| Tom a-melding | |
| Opplysningspliktig | fødselsnummer |
| MeldingsID | 2 |
| Erstattar meldingsID | 1 |
Ingen andre opplysningar.
| Ny a-melding | |
| Opplysningspliktig | juridisk organisasjonsnummer |
| MeldingsID | 1 |
I tillegg fører dei opp andre obligatoriske opplysningar.
Feil som gjeld organisasjonsnummer for verksemder
Dersom du har oppgitt feil organisasjonsnummer for verksemda, og ikkje har fått feilmelding på dette i tilbakemelding (A03), må du flytte tilsette til rett nummer.
For å rette opp må du først sende inn ei tom a-melding med organisasjonsnummer for verksemda som er feil. Deretter sender du ei ny a-melding på rett juridisk organisasjonsnummer og organisasjonsnummer for verksemda.
Dersom du nyttar eit lønnssystem, kontaktar du systemleverandøren dersom du er usikker på korleis du rettar i ditt system.
Kva brukar vi opplysningane til
Alle opplysningar i a-meldinga er knytte til eit juridisk organisasjonsnummer (ev. organisasjonsnummer for organisasjonsledd). Dette nyttar ein når opplysningar i a-meldinga blir distribuert til NAV, Statistisk sentralbyrå og Skatteetaten.
Opplysningar om organisasjonsnummer for verksemder, saman med opplysningar om arbeidsforhold, skal overførast til Aa-registeret. Aa-registeret gir ei oversikt over kva for arbeidstakarar som er tilsette i kvar einskild verksemd.
Offentlege myndigheiter som NAV, Skatteetaten, Statistisk sentralbyrå, Arbeidstilsynet og politietaten nyttar opplysningar frå Aa-registeret til oppgåveløysing og kontroll.
