1. Vilkår for å få refundert MVA gjennom refusjonsordninga

På generelt grunnlag nemner vi desse vilkåra som må vere til stades for å kunne få mva-refusjon gjennom refusjonsordninga (sjå meirverdiavgiftslova § 10-1 (1)):

• At du ikkje har hatt avgiftspliktig omsetning i Noreg dei siste 12 månadene (ikkje har selt varer/tenester i Noreg).
• At varene/tenestene skal nyttast i verksemda di.
• At omsetninga utanfor Noreg hadde ført til registreringsplikt dersom omsetninga hadde skjedd her.
• At meirverdiavgifta hadde gitt rett til frådrag dersom verksemda di var registrert i Noreg.

Vi refunderer ikkje inngåande meirverdiavgift for varer som du kjøper inn eller innfører til Noreg og deretter omset her. Det same gjeld meirverdiavgift for varer ein innfører for å levere dei til ein kjøpar i meirverdiavgiftsområdet.

Verksemder som omset varer og tenester i Noreg har ikkje rett til refusjon av mva gjennom refusjonsordninga. Slike verksemder registrerer seg i det norske meirverdiavgiftsregisteret for å ha rett til frådrag av mva.

2. Søknad om refusjon av MVA

Det er søknadsskjema RF-1032 som skal nyttast når ein søkjer om refusjon av MVA. Vi ber om de les rettleiinga på side 4 og 5 i søknadsskjemaet nøye når de fyller ut skjemaet.

Søknadsfristen for føregåande kalenderår er 30. september. Det vil seie at søknaden må vere poststempla seinast denne datoen.

Du bør fylle ut skjemaet elektronisk før du skriv det ut, signerer og sender det til oss i original per post. Dersom du fyller ut skjemaet for hand, må du bruke blokkbokstavar. Skjemaet må fyllast ut på norsk, svensk, dansk eller engelsk. Søknader om refusjon av meirverdiavgift blir handsama etter norsk lovgiving.

Sakshandsamingstid

Normal sakshandsamingstid er seks månader.

Er selskapet fellesregistrert for MVA i heimlandet?

Selskap (sjølvstendige juridiske einingar) som er fellesregistrerte for MVA i heimlandet får berre frådrag/refusjon for norsk MVA på fakturaer som er stila til søkjaren. Det vil seie at søkjaren si fellesregistrering i heimlandet ikkje gjeld i høve til norske avgiftsmyndigheiter. Ein søknad skal sendast i namnet til den einskilde juridiske eininga, og kostnaden ein søkjer om refusjon for, skal vere til bruk i denne verksemda. Det er viktig å gjere dette på rett måte, då det ikkje er mogleg å korrigere og sende inn ein ny søknad etter søknadsfristen.

3. Kva skal ein leggje ved søknaden

Fakturaer

Kopi av fakturaer/rekneskapsbilag og eventuelle utførselsdokument skal leggjast ved søknaden. Vi returnerer ikkje innsendte bilagskopier når søknaden er ferdig handsama, viss søkar ikkje har bede om det.

Attest frå offentleg styresmakt i heimlandet til søkjaren

Du må sende inn kopi av ein attest som stadfestar at du i søknadsperioden har drive den typen næringsverksemd som er oppgitt i boks 3 i søknadsskjemaet. Attesten er gyldig i eitt år etter at han er utferda. Vi sender deg døme på godkjende attestar frå ulike land dersom du ber om dette. Skriv kva for land du ønskjer døme på.

Eventuelt ei fullmakt

Du må sende inn ei fullmakt i original dersom du søkjer refusjon gjennom ein fullmektig (må ikkje forvekslast med kontaktperson i verksemda.)

Attesten og fullmakta skal vere på norsk, svensk, dansk eller engelsk. Dersom dei er utferda på eit anna språk, må du leggje ved ei stadfesta omsetjing.

4. Viktig informasjon når du skal fylle ut søknaden

Søknadsperiode

Søknaden må gjelde ein periode på minst 3 månader, maksimalt eit kalenderår. Perioden kan vere kortare enn 3 månader dersom han utgjer resten av eit kalenderår. Døme på korrekte periodar kan vere kvartal, halvårleg eller eit heilt kalenderår.

Søknaden må gjelda varer/tenester som er leverte eller fakturert i søknadsperioden avhengig av kva for eit tidspunkt som er det seinaste.

Søknadsbeløp

Beløpet ein søkjer om å få refundert må vere minst NOK 5 000. Dersom søknaden gjeld eit heilt kalenderår, eller resten av eit kalenderår, er det minste søknadsbeløpet NOK 500.

5. Avgiftsinfo

Nokre gonger i året utferdar vi ein VATinfo der vi informerer om eventuelle regelendringar, praksis og liknande som gjeld refusjon av MVA til utanlandske næringsdrivande. Nedst på sida finn du dei ulike utgåvene.

6. Søknad om refusjon av norsk MVA skal sendast til:

Postadresse:

Skatteetaten 
Postboks 103
1501 Moss

Vi tek ikkje imot søknader på epost.

7. Kontaktinformasjon

Besøksadresse (skal nyttast når ein sender pakkar med bud):

Skatteetaten
Bernt Ankers gate 17
1534 MOSS

E-post: [email protected]

Denne e-postadressa skal berre nyttast til førespurnader som gjeld MVA-refusjon til utanlandske næringsdrivande.

Vi kan diverre ikkje svare på andre førespurnader via denne e-postadressa.