24. oktober 1988 fastsette Skattedirektoratet med verknad frå og med inntektsåret 1988, forskrift nr 844 om høve til å sende inn datautskrift i staden for fortrykte likningsskjemaa. Forskrifta er fastsett med heimel i lov av 13. juni 1980 nr 24 om likningsforvaltning §§ 4-3 nr 3, 4-4 nr 7, 6-16 bokstav b og selskapsskattelova § 9-2 med tilhørande forskrifter, jf Finansdepartementets delegeringsvedtak av 28. november 1994.

På skatteetatens internettside: www.skatteetaten.no kan ein hente dei fleste likningsskjmaa for 1998.

Den generelle regelen er no at det kan nyttast datautskrift, dersom utskrifta oppfyller krava i §§ 2 - 4 i forskrifta. "Lønns- og trekkoppgåve" (RF 1023 og 1024) og "Årsoppgåve for arbeidsgivaravgift - Følgjeskriv til lønns- og trekkoppgåver" (RF-1025) er likevel ikkje omfatta av denne forskrifta.

I følgje kunngjering av 15. desember 1998 har Skattedirektoratet i medhald av nemnde forskrift vedteke at "Sjølvmelding for næringsdrivande m m" kan leverast som datautskrift når vilkåra i forskrifta sine §§ 2-4 er oppfylde og datautskrifta er skrive ut av revisoren, rekneskapsføraren eller advokaten til skattytaren. Det er eit vilkår at datautskrifta blir underteikna, og at ho blir lagt inn i det orginale skjemaet der identifikasjonsrubrikkane på side 1 må fyllast ut. Vedtaket gjeld med verknad for inntektsåret 1998. I medhald av forskrift nr 844 (nemnd ovanfor) kan Skattedirektoratet gi visse grupper skattytarar høve til å levere datautskrift av "Sjølvmelding for næringsdrivande m m" når utskrifta oppfyller krava i §§ 2-4 i forskrifta.

Forskrifta stiller elles krav til innhaldet i datautskrifta og til utforming, kvalitet/format m m. Forskrifta med merknader er mellom anna teke inn i Skattedirektoratets melding Sk nr 6/1989 (Utv 1989 s 160). I "Rettleiing for innsending av årsoppgjer som vedlegg til sjølvmeldinga" (RF-1074) er det også gjort greie for skjema der ein kan nytte datautskrift.

Ein må vere merksam på at nokre skjema skal leverast i fleire eksemplar, t d RF-1207 "Aksjonærbidrag 1998 - Opplysningar om innbetalt bidrag".

Det er ikkje høve til å leggje ved særskilt oppstilling av resultatrekneskapen og balansen i dei allmenne næringsoppgåvene. Skattytaren har plikt til å fylle ut resultatrekneskap og balanse i næringsoppgåva, eller levere datautskrift i samsvar med forskrifta nemnd ovanfor.