Om innkrevjingsmyndigheita
Innkrevjingsmyndigheita i Skatteetaten krev inn skattar og avgifter, men også pengar på vegner av andre aktørar som politiet, Lånekassen, Statens vegvesen, Nav og ei rekkje personlege bidragsmottakarar.
Det betyr at vi kan krevje inn til dømes bøter, erstatningar, tvangsmulkter, studielån, barnebidrag og feilutbetalte ytingar frå Nav.
I tillegg har innkrevjingsmyndigheita ansvar for pengehandteringa i samband med trekk i inntekt. Dette gjeld også når trekket er vedtatt av namsmannen.
Nytt regelverk frå 1. januar 2026
Frå 1. januar 2026 gjeld nye reglar for innkrevjing. Samtidig blir Statens innkrevjingssentral, Innkrevingssentralen for bidrag og tilbakebetalingskrav og innkrevjing av skatte- og avgiftskrav i Skatteetaten samla til éi innkrevjingsmyndigheit.
Den nye innkrevjingslova gjer det mellom anna mogleg å samle krav frå det offentlege i eitt, samla trekk i inntekt i samband med tvangsinnkrevjing. Det samla utleggstrekket kan bestå av fleire krav frå ulike styresmakter. Ved innbetaling av eitt trekk som skal dekkje fleire krav frå ulike kreditorar, er det innkrevjingsmyndigheita som fordeler innbetalinga til kreditorane.
Program for enklare innkrevjing
Digitaliseringsprogrammet Fremtidens innkreving og den nye innkrevjingslova frå 2026 skal gjere innkrevjing enklare og meir effektivt for innbyggjarar, verksemder, stat og kommune.
Det inneber mellom anna nye system og tenester både for dei som skal betale krav og for dei som er med på å krevje inn pengane.
Det vil vere ein gradvis overgang frå dei gamle til dei nye systema og tenestene fram til 2029.
Korleis betale krav til oss?
Du får informasjon om korleis du skal betale inn eit krav på fakturaen.
Du finn også betalingsinformasjon på skatteetaten.no. Ver merksam på at det er ulike kontonummer for innbetaling til oss. Du må ta utgangspunkt i kva krav du har fått for å betale til rett kontonummer.
Spørsmål om krav eller innkrevjing
Lurer du på kvifor du har fått dette kravet, eller kva det gjeld? Då må du ta kontakt med dei som har fastsett kravet, til dømes politiet, Lånekassen, Statens vegvesen eller Nav.
Dersom du har spørsmål knytte til sjølve innkrevjingsprosessen eller betalinga av krava, kan du ta kontakt med oss. Det enklaste er å bruke kontaktinformasjonen på fakturaen eller i brevet du har fått frå oss.