Bustadregistrering for stortingsrepresentantar og regjeringspolitikarar

Om du har pendlarbustad, eller du oppheld deg skiftevis på to eller fleire bustader i Noreg på grunn av vervet, må du melde flytting til Folkeregisteret.

Gjeld det meg?

Informasjonen på denne sida gjeld for deg som er

  • medlem av Stortinget eller regjeringa
  • statssekretær
  • politisk rådgivar i departementa eller ved statsministerkontoret
  • ektefelle eller barn i husstanden til ovannemnde
  • statsminister eller del av husstanden til statsministeren

Hovudregel og særregel for stortingsrepresentantar og regjeringspolitikarar

Du skal som hovudregel vere busett der du overnattar mest

Hovudregelen seier at du skal vere registrert busett i Folkeregisteret der du har flest overnattingar.

Særregel for stortingsrepresentantar og regjeringspolitikarar

Som stortingsrepresentant eller regjeringspolitikar, kan du velje om du vil nytte deg av særregelen i folkeregisterlova § 5-4. Du kan då, på nærare vilkår, framleis vere registrert som busett på heimstaden sjølv om du har døgnkvilen din på arbeidsstaden. Du vil bli registrert som pendlar i Folkeregisteret.

Ektefelle og barn i husstanden skal som hovudregel vere registrerte på same adresse som deg på heimstaden, med mindre dei har ei særleg svak tilknyting til bustaden.

Det blir stilt følgjande krav:

  • Det skal vere minst 40 km mellom bustaden på heimstaden og arbeidsstaden.
  • Du må disponere bustaden på heimstaden gjennom eit reelt eige- eller leigeforhold med alminnelege vilkår.
  • Bustaden på heimstaden må vere fullverdig.
    • Med fullverdig bustad siktar ein til låsbar bueining til bustadføremål på minst 35 kvadratmeter, med innlagt vatn og avløp, og som berre blir disponert av representanten eller regjeringspolitikaren alle dagar i veka.
    • Viss ein bustad som er eigd blir delvis leigd ut, aukar arealkravet med 20 kvadratmeter for kvar bebuar over 15 år. Personen som blir omfatta av særregelen må disponere minst halvparten av bustaden, og ha bruksrett til minimum eitt soverom.
    • Det finst unntak frå arealkravet for dei som har sin første periode på Stortinget eller som regjeringspolitikar.
    • Det finst også unntak frå krava til fullverdig bustad for dei som leiger rom i bufellesskap og har sin første periode på Stortinget eller som regjeringspolitikar.

Du må ha minst tre heimreiser i året.

Nedst på sida finn du tilvisingar og lenkjer til regelverket.

Endringane i føresegna trer i kraft 1. oktober 2025.

Du må dokumentere arbeidssituasjonen og bustaden

For at vi skal få behandla meldinga di, må du laste opp dokumentasjon som vedlegg til flyttemeldinga.

Du må dokumentere arbeidssituasjonen din ved å oppgi lenke til aktuell nettside, eller leggje ved annan dokumentasjon som viser at du er i den gruppa som blir omfatta av særregelen.

 

Dersom bustaden er vesentleg større enn 35 kvadratmeter, kan du opplyse oss om arealet på bustaden i flyttemeldinga. Om ikkje, ber vi deg dokumentere bustaden på heimstaden med leige-/kjøpekontrakt, takst eller målsette arkitektteikningar som viser det interne bruksarealet til bustaden. Dersom delar av bustaden er leigde ut, må du dokumentere dette.

I tillegg må du informere oss om:

  • avstanden mellom bustaden på heimstaden og arbeidsstaden
  • talet på heimreiser per år

Slik melder du flytting

Om du ønskjer å bli bustadregistrert i Folkeregisteret etter denne særregelen, må du melde flytting etter særregelen.

Logg inn:

Meld flytting etter særregelen

Om du ikkje ønskjer å bruke særregelen, skal du sende vanleg flyttemelding.

Om du ønskjer å melde flytting på papir, fyller du ut skjemaet RF-1400 Melding om flytting (PDF).

Om du ønskjer å bruke særregelen for stortingsrepresentantar og regjeringspolitikarar, må du skrive dette på flyttemeldinga. Du må leggje ved dokumentasjonen som er nemnd ovanfor saman med kopi av gyldig legitimasjon.

Slik påverkar det skatten din

Har du bustad på heimstaden din, kan du på visse vilkår disponere ein pendlarbustad utan at du må betale skatt av denne fordelen.

Vilkår for skattefri pendlarbustad:

  • Det må vere minst 40 km mellom bustaden på heimstaden og arbeidsstaden.
  • Du må disponere bustaden på heimstaden gjennom eit reelt eige- eller leigeforhold med alminnelege vilkår.
  • Bustaden på heimstaden må vere fullverdig.
    • Med fullverdig bustad siktar ein til låsbar bueining til bustadføremål på minst 35 kvadratmeter, med innlagt vatn og avløp, og som berre blir disponert av representanten eller regjeringspolitikaren alle dagar i veka.
    • Viss ein bustad som er eigd blir delvis leigd ut, aukar arealkravet med 20 kvadratmeter for kvar bebuar over 15 år. Personen som blir omfatta av særregelen må disponere minst halvparten av bustaden, og ha bruksrett til minimum eitt soverom.
    • Det finst unntak frå arealkravet for dei som har sin første periode på Stortinget eller som regjeringspolitikar.
    • Det finst også unntak frå krava til fullverdig bustad for dei som leiger rom i bufellesskap og har sin første periode på Stortinget eller som regjeringspolitikar. Om du leiger ut bustaden delvis, må utleiga vere skattefri etter skattelova § 7-2 første ledd bokstav a. Dette betyr at leigeforholdet må vare samanhengande i minst 30 dagar, og du må disponere minst halvparten av bustaden (rekna etter utleigeverdi) som eigen bustad.

Du må ha minst tre heimreiser i året.

Endringane i føresegna trer i kraft 1. oktober 2025.

Dersom vilkåra over ikkje er oppfylte, må du betale skatt av fordelen av pendlarbustaden. Skattepliktig fordel skal normalt fastsetjast til kva det ville ha kosta å leige ein tilsvarande bustad (marknadsleige).

Du finn meir informasjon om reglane for skattefri pendlarbustad og andre skattereglar av særleg betydning for deg i Skatt-ABC: S-20 Stortingsrepresentanter mv.

Dersom pendlarforholdet endrar seg

Om pendlarforholdet ditt endrar seg fordi du til dømes flyttar eller du ikkje lenger skal reknast som pendlar, må du sende oss ein førespurnad.

Regelverk