Lån

Er du skattemessig busett i Noreg, har du krav på frådrag for gjeldsrenter. Frådraget for gjeldsrenter blir avgrensa dersom

• du utøver/deltar i verksemd i utlandet, og inntektene frå verksemda er fritatte frå skattlegging i Noreg etter skatteavtale
• du har fast eigedom i utlandet, og inntektene frå eigedommen ikkje er skattepliktige i Noreg etter skatteavtale

Frådraget skal likevel ikkje avgrensast dersom du eig bustad eller fritidsbustad i ein annan EØS-stat og skatteavtalen seier at inntekta ikkje skal skattleggjast i Noreg. Det same gjeld når du er borgar av eit EØS-land og er busett i det landet etter skatteavtalen Noreg har inngått med landet. Du må også ha hatt heile eller tilnærma heile (minst 90 prosent) av den samla inntekta di i Noreg.  

Har du kravd frådrag for gjeldsrenter i det landet der bustaden eller fritidsbustaden ligg, kan du ikkje samtidig krevje frådrag for dette beløpet i Noreg.

Er du ikkje skattemessig busett i Noreg, har du i utgangspunktet berre krav på frådrag for gjeldsrenter som er knytte til fast eigedom i Noreg eller næringsverksemd som er skattepliktig i Noreg.

Er du busett i ein EØS-stat, kan du likevel få frådrag for gjeldsrentene dersom heile eller tilnærma (90 prosent) heile den samla inntekta di er skattepliktig i Noreg.

Om du har inntekt frå fast eigedom eller verksemd i utlandet som er fritatt frå skattlegging i Noreg etter skatteavtale, blir likevel frådraget avgrensa for gjeldsrenter.

Frådraget skal likevel ikkje avgrensast dersom du eig bustad eller fritidsbustad i ein annan EØS-stat og skatteavtalen seier at inntekta ikkje skal skattleggjast i Noreg. Har du kravd frådrag for gjeldsrenter i det landet der bustaden eller fritidsbustaden ligg, kan du ikkje trekkje frå dette beløpet i Noreg.

Krev du standardfrådrag, kan du ikkje krevje frådrag for gjeldsrenter. Frå og med 01.01.2019 (skattemeldinga for 2019) er retten til standardfrådrag avgrensa til berre å gjelde utanlandske sjøfolk og sokkelarbeidarar.

Dette legg du sjølv inn i skattemeldinga di. Skatteetaten reknar automatisk om frå utanlandsk til norsk valuta om du vel utanlandsk valuta når du legg inn beløpet.

I nokre tilfelle, til dømes om du leverer vedleggsskjema som ikkje automatisk reknar om valutaen, må du rekne om utanlandsk valuta sjølv.

Omrekning av utanlandsk valuta til norske kroner

Om vi spør, så må du kunne dokumentere:

• gjeld og gjeldsrenter med stadfesting frå låneinstitusjonen
• at du ikkje har kravd frådrag for gjeldsrentene i landet der bustaden eller fritidsbustaden i ein annan EØS-stat ligg
• at heile eller tilnærma heile inntekta di er skattepliktig i Noreg dersom du ikkje er skattemessig busett i Noreg og krev frådrag for gjeldsrenter. Samanlikningsgrunnlaget er den totale inntekta di før frådrag i dei ulike landa.