1.13 Nye skjema i 1998

Skjema som gjeld nedsetjing av inntektsskatt på lønn og pensjon etter den alternative fordelingsmetoden

Når det i skatteavtale er fastsett at dobbeltskattlegging av inntekt skal førebyggjast ved den alternative fordelingsmetoden, skal skjemaet "Nedsetting av inntektsskatt på lønn og pensjon etter den alternative fordelingsmetoden" (RF-1150) nyttast for å fordele inntekter og utgifter som er ført i sjølvmeldinga mellom Noreg og utlandet. For inntektsåret 1998 gjeld dette berre for lønn som er skattepliktig til eit anna nordisk land og pensjon frå eit anna nordisk land. Den alternative fordelingsmetoden går ut på at ein ved den norske skattlegginga reknar slik lønn og/eller pensjon med i grunnlaget for toppskatt og allmenn inntekt, men at skatten blir sett ned med den delen av skatten som fell på den utanlandske lønna og/eller pensjonen. Utrekna inntektsskatt blir sett ned maskinelt i samband med likningsbehandlinga. Skattytarar som både har inntekt som kjem inn under reglane om den alternative fordelingsmetoden og om kreditmetoden, skal fylle ut både skjemaet RF-1150 og skjemaet "Frådrag i norsk skatt for skatt betalt i utlandet (kreditfrådrag) for lønnsmottakarar, pensjonistar og personleg næringsdrivande" (RF-1147).

Rettleiinga er teken inn på skjemaet.

Fastsetjing av formuesverdien i kraftanlegg ( RF-1095)

Sjå omtale under avsnitt 1.10 "Skjema som gjeld kraftføretak som får inntekta fastsett etter særreglane i skattelova § 19 A flg."