Sats for:

Kost – sats for overtidsmat ved lange arbeidsdagar

Viss du får dekt mat av arbeidsgivar, er dette i utgangspunktet skattepliktig. Det er fordi dette blir rekna som dekning av private utgifter.

Arbeider du lange dagar utanfor heimen, kan du likevel få dekt mat og drikke skattefritt viss arbeidsgivar kjøper inn måltidet eller dekkjer kostnadene dine etter rekning.

.

Reglane for skattefri overtidsmat er endra frå 2019. Det er lengda på arbeidstida og ikkje fråværet frå heimen som avgjer om du som tilsett kan få skattefri overtidsmat.

Arbeidsgivar kan dekkje kostnader til eitt måltid ved overtid eller lange arbeidsdagar skattefritt etter følgjande vilkår:

  • Du jobbar minimum 10 timar samanhengande utanfor heimen. Du kan ete måltidet før du har arbeidd 10 timar, så lenge den totale arbeidstida oppfyller kravet om 10 timar.
  • Dekninga blir gitt gjennom naturalyting eller refusjon av utgiftene dine og er avgrensa til satsen under.
  • Ved refusjon må kostnadene til overtidsmat i tillegg dokumenterast med kvittering eller faktura med meir.

Viss matpengar ved overtid blir utbetalte utan at kostnadene dine kan dokumenterast, er beløpet skattepliktig som lønn. Dette gjeld sjølv om matpengane ikkje overstig satsen under.

 

Når dekning av overtidsmat overstig trekk-/skattefritt beløp

Mottar du dekning av overtidsmat med meir enn 200 kroner, er beløpet som overstig 200 kroner trekk- og skattepliktig for deg. Dette føreset at arbeidsgivar splittar dekninga i ein trekkfri del og ein trekkpliktig del på utbetalingstidspunktet.

Viss beløpet ikkje blir splitta opp eller dei andre vilkåra som er nemnde over ikkje er oppfylte, er heile beløpet skattepliktig. 

 

Kostsatsen for eitt fritt måltid blir ikkje brukt for overtidsmat

Satsen for fordel av arbeidsgivar si dekning av fri kost (eitt måltid) er meint for tilfella der det er vanskeleg å fastsetje omsetningsverdien på fordelen for den enkelte skattytar. Det vil til dømes vere ved verdsetjing av eit fritt måltid i kantine.

Kostsatsen for eitt måltid (52 kroner i 2024) kan likevel brukast når arbeidstakar et middag i fri kantine når vilkåra for skattefri overtidsmat ikkje er oppfylte, til dømes kortare arbeidsdag enn 10 timar.


  Sats

Maksimumsbeløp for trekkfri/skattefri dekning av overtidsmat

kr 200 per døgn