Sats for:
Kost og losji – sats for frådrag
Dersom du overnattar ein annan stad enn heime på grunn av jobb, kan du i ein periode ha krav på frådrag for meirkostnader til mat (kost) og overnatting (losji) etter satsane under.
Er du på yrkes-/tenestereise utan overnatting, har du også i visse tilfelle rett til frådrag for meirkostnader til kost på reisa.
Som pendlar har frådragsrett for meirkostnader til kost (mat og drikke) når pendlarbustaden ikkje har kokemoglegheiter, og i maksimalt 24 månader rekna frå det tidspunktet du først vart gitt frådrag for meirkostnadene.
Tidsavgrensinga på 24 månader gjeld òg for losji, noko som betyr at frådragretten for kost og losji stoppar etter 24 månader, rekna frå det tidspunktet frådraget først blir gitt.
Reglane om maksimalt 24 månader med frådrag hadde verknad frå og med inntektsåret 2020. Tidsavgrensinga på 24 månader blir berekna frå 1. januar 2018, slik at bortfallet av frådragretten først skjedde frå 1. januar 2020.
Skifter du kommune for både arbeidsstad og pendlarbustad, kan du få frådrag i ei ny 24-månadersperiode
Kari jobbar i Trondheim, og bur i Oslo med familien sin. Ho byrja å jobbe i Trondheim 01.01.2019, og ho kravde frådrag for husleige (losji) for pendlarbustad i Trondheim i skattemeldinga for 2019 og 2020.
24-månadersperioden går ut 31.12.2020
Kari kan ikkje føre frådrag for utgiftene sine til losji i skattemeldinga for 2021 eller seinare, fordi 24-månadersperioden gjekk ut 31.12.2020.
Ny jobb
Den 01.01.2023 fekk Kari jobb i Ålesund. Der får ho seg ein ny pendlarbustad. Fordi ho har skifta både arbeidsstad og pendlarbustad til ein ny kommune, kan ho på nytt krevje frådrag for husleige (losji) i skattemeldinga for 2023.
Frådragssatsen svarer til det du kan motta som trekk- og skattefri utgiftsgodtgjersle til dekning av kost og losji.
Kost (mat)
På yrkes-/tenestereiser utan overnatting vil meirkostnader til mat inngå i minstefrådraget for lønnstakarar. I den grad du krev frådrag for faktiske kostnader i staden for minstefrådraget, blir det gitt frådrag for dokumenterte meirkostnader til mat (det vil seie ikkje etter sats) på yrkes-/tenestereisa.
På yrkes-/tenestereiser med overnatting eller pendlaropphald, blir det gitt frådrag for meirkostnader til mat etter fastsette satsar som Skattedirektoratet gir årleg. Frådragsretten føreset at du sjølv har dekt kostnadene til mat. På reiser med overnatting er staden der overnattinga skjer (type losji) avgjerande for kva du kan få i frådrag. I tillegg vil skiljet mellom yrkesopphald og pendlaropphald bety noko dersom overnattingsstaden er privat med kokemoglegheiter eller privat.
Losji
Du får frådrag for dei reelle utgiftene dine til å bu (leige, faste utgifter til pendlarbustad med meir).
Kost
Satsane for meirutgifter til mat (kost) avheng av korleis du bur.
| Type losji | Sats per døgn |
| Hotell med frukost: | 526 kroner |
| Hotell utan frukost: | 658 kroner |
| Bustad med kokemoglegheiter (berre ved teneste-/yrkesreise) | 102 kroner |
| Bustad utan kokemoglegheiter* | 400 kroner |
*Som bustad utan kokemoglegheit reknar vi og overnatting på pensjonat eller på brakke uavhengig av om det er mogleg å lage mat i bustaden. For overnatting på brakke gjeld dette frå og med 2023.
Satsane føreset at du dekkjer dei reelle kostnadene til kost sjølv, utan subsidiering med meir frå arbeidsgivar eller annan oppdragsgivar. Tillegg for kostinnsparing er inkludert i alle satsane over.
Losji
| Type losji | Sats per døgn |
| Overnattar i eiga campingvogn | 76 kroner per døgn |