Fagforeiningsfrådrag

Har du betalt fagforeiningskontingent, kan du trekkje frå inntil 7 700 kroner i den skattepliktige inntekta di for 2023. For inntektsåret 2024 kan du trekkje frå inntil 8 000 kroner. Har du betalt fagforeiningskontingent for ein del av året, blir maksimumsbeløpet redusert forholdsmessig.

Dette gjeld alle yrkesaktive lønnstakarar som har

  • blitt trekt via lønnsslipp for fagforeiningskontingent til arbeidstakarorganisasjon
  • betalt fagforeiningskontingent direkte til arbeidstakarorganisasjonen

eller

  • betalt fagforeiningskontingent til ein arbeidstakarorganisasjon i ein annan EØS-stat som har inngått tariffavtale på vegner av medlemmane

Maksimalt frådrag:

  • For inntektsåret 2023 er 7 700 kroner.
  • For inntektsåret 2024 er 8 000 kroner.

Maksimalt frådrag er uavhengig av antal medlemskap. Du kan også sjå satsar for kvart år.

Skattemeldinga di er normalt utfylt med det du har betalt i fagforeiningskontingent. Summen baserer seg på det som har blitt rapportert inn av arbeidsgivaren din i a-meldinga, så sjekk at alt er riktig.

Har du betalt direkte til fagforeininga og levert ei attestert oppgåve over innbetalt kontingent til arbeidsgivaren din, skal arbeidsgivar rapportere inn beløpet.

Beløpa du skal sjekke mot står i den årlege samanstillinga over inntekter, frådrag og skattetrekk som du får frå arbeidsgivaren i januar/februar.

Dersom beløpet er feil, må du endre det i skattemeldinga. Du bør også ta kontakt med arbeidsgivar for at samanstillinga skal bli riktig.

Viss du har betalt direkte til fagforeininga, kan summen vere rapportert inn av fagforeininga.

Du treng ikkje sende oss dokumentasjon på dette, men du må kunne leggje fram dokumentasjon dersom vi ber om det.

Dersom du fører frådrag, må du kunne dokumentere betalt kontingent

  • viss du har betalt direkte til fagforeininga: med attestert oppgåve frå fagforeiningskasseraren
  • viss du har betalt via trekk frå arbeidsgivar: stadfesting frå arbeidsgivar på trekt beløp