Ektefellar kan i visse tilfelle få lågare samla skatt

For å få lågare samla skatt, kan ektefellar og meldepliktige sambuarar fritt velje kven som skal føre kapitalinntekter og kapitalfrådrag i skattemeldinga si. Dette gjer de ved å flytte kapitalinntekter over til skattemeldinga til den som har lågast pensjon.

Merk! Dette betyr at de ikkje kan bruke ordninga med leveringsfritak, men må levere skattemeldingane.

Alle som i heile 2025 har mottatt

• 100 prosent alderspensjon etter folketrygdlova eller er fødde i 1962 eller tidlegare og får 100 prosent avtalefesta pensjon i offentleg sektor og
• har samla pensjonsinntekt som ikkje overstig 276 400 kroner,

kan få skattefrådrag på inntil 36 000 kroner. Frådraget blir avgrensa til summen av inntektsskatt og trygdeavgift. 

Du som er fødd i 1963 eller seinare og som får ny AFP i offentleg sektor, vil ha rett til skattefrådrag på grunnlag av at du får alderspensjon frå folketrygda. 

Var pensjonen din i 2025 lågare enn 276 400 kroner og du ikkje hadde andre inntekter, blir summen av inntektsskatten og trygdeavgifta di lågare enn 36 000 kroner. Då får du ikkje brukt heile skattefrådraget.

Ektefellar kan fritt velje kven av dei som skal ta med kapitalinntekter, kapitalutgifter og visse andre frådrag i skattemeldinga si. Skatteetaten har førehandsutfylt inntektene og frådraga i skattemeldinga til den ektefellen dei er registrerte på. Det er ikkje mogleg å foreslå ei anna fordeling i den førehandsutfylte skattemeldinga. Vil de endre denne fordelinga, kan de sjølve flytte inntekter og frådrag i skattemeldingane dykkar og deretter levere dei inn.

Liste over kva inntekter og frådrag som kan overførast mellom dykk.

Flytting av kapitalinntekter eller kapitalutgifter er aktuelt for dykk dersom ein eller begge er alderspensjonist(ar) og:

• ein av dykk har så låg pensjon at han eller ho ikkje får brukt heile skattefrådraget for pensjonsinntekt og den andre har eiga inntekt eller pensjon, og
• de har kapitalinntekter som er førehandsutfylte i skattemeldinga til den med høgast inntekt, eller kapitalutgifter som er førehandsutfylte i skattemeldinga til den med låg pensjon.

Er skattefrådraget ditt, som blir vist i den førebelse skatteberekninga di, lågare enn det maksimale skattefrådraget på 36 000 kroner? Då kan det vere at de ikkje utnyttar maksimalt skattefrådrag. Her finn du meir informasjon dersom du ikkje har fått brukt heile skattefrådraget ditt.

Bruk gjerne skattekalkulatoren vår for å rekne ut skatt og skattefrådrag.