Reiseutgifter ved besøk i heimen, trekkfri bilgodtgjering, fordel ved bruk av arbeidsgivar sin bil og rentefordel ved rimelege lån i arbeidstilhøve i 2002

Skattedirektoratets satsar for kost i 2002 er endra i forhold til 2001. Det er teke omsyn til endringane i konsumprisindeksen for matvarer og for husleige, lys og brensel fram til september 2001.

Skattedirektoratets forskottssatsar for trekkfri kostgodtgjering for arbeidstakarar som bur på pensjonat og for arbeidstakarar som bur på hybel/brakke der det er høve til å koke mat er minska i forhold til 2001.

Skattedirektoratet har fastsett frådragssatsar for bruk av bil ved besøk i heimen og satsar for fordel ved bruk av arbeidsgivar sin bil for inntektsåret 2002 (òg mellom heimen og arbeidet). Trekkfri bilgodtgjering og rimelege lån i arbeidstilhøve er også omtalt.

Kunngjering av 19. desember 2001 om satsane for trekkpliktige naturalytingar i 2002 er teke inn som påtrykt vedlegg.

1 Skattedirektoratets satsar for kost og losji for inntektsåret 2002

Med heimel i skattebetalingslova § 6 nr. 2, jf. § 2-1 i forskrift frå 21. juni 1993 om m. a. verdsetjing av naturalytingar, sjå melding Sk nr. 12/1993, har Skattedirektoratet fastsett følgjande satsar for verdien av fri kost og losji ved utrekning av forskottstrekk og ved likninga for 2002:

Fritt opphald (kost og losji)kr 86 pr. dag Fri kost (alle måltid)kr 63 pr. dag Fri kost (to måltid)kr 49 pr. dag Fri kost (eitt måltid)kr 33 pr. dag Fritt losji (eitt eller delt rom)kr 23 pr. dag

Det er teke omsyn til endringane i konsumprisindeksen for matvarer og for husleige, lys og brensel frå september 2000 til september 2001.

Satsane gjeld heile landet. Berre dagar arbeidstakaren faktisk får slike ytingar skal reknast med.

Blir Skattedirektoratets satsar nytta, skal desse gjelde for alle tilsette når trekk og arbeidsgivaravgift skal reknast ut, både i bokføringa og i lønnsoppgåva.

Satsane for fri kost skal nyttast same kva for stilling mottakaren har i verksemda, og kvar for seg for familiemedlemmer som får ytinga. For barn som ikkje har fylt 10 år innan utgangen av 2002, skal satsane for fri kost halverast.

Blir arbeidstakaren trekt for verdien av kost og losji etter satsar fastsette anten av Skattedirektoratet eller i tariffavtale, skal skattetrekk og arbeidsgivaravgift reknast av bruttolønn.

Dersom trekket i lønna er mindre enn satsane i tariffavtala og dessutan under satsane frå Skattedirektoratet, skal ein gi eit tillegg i bruttolønna. Tillegget skal vere lik differansen mellom direktoratet sine satsar og det beløpet som er trekt.

Dersom satsane for kost og losji i særlege tilfelle skulle verke klårt urimelege, kan ytingane setjast til ein lågare verdi ved likninga . Det er føresetnaden at denne ordninga berre skal reserverast for heilt spesielle tilfelle og difor berre skal kunne nyttast unntaksvis. Det er ikkje overlate til arbeidsgivarane å ta individuelle omsyn (nytte reduserte satsar) ved fastsetjing av trekkgrunnlaget.

Sjå òg den påtrykte kunngjeringa.

2 Skattedirektoratets forskottssatsar for trekkfri kostgodtgjering og frådrag for meirutgifter til kost ved lange daglege fråvær

2.1 Skattedirektoratets forskottssatsar for trekkfri kostgodtgjering Forskottssatsane for trekkfri kostgodtgjering for 2002 er følgjande pr. døgn:

For arbeidstakarar som bur på pensjonat eller hybel/-brakke utan høve til å koke ma kr 232

For arbeidstakarar som bur på hybel/-brakke der det er høve til å koke mat eller har overnatta privat: kr 154

Får arbeidstakaren i tillegg dekt eitt eller fleire måltid, må den trekkfrie godtgjeringa reduserast med 10 prosent for frukost, 40 prosent for lunsj og 50 prosent for middag (beløp skal rundast opp eller ned til nærmaste heile krone).

2.2 Frådrag for meirutgifter til kost ved lange daglege fråvær Den satsen som blir nytta når arbeidstakar får godkjent kostutgifter ved samanhengande fråvær frå heimen på 12 timar eller meir, jf. takseringsreglane post 3.2.2, er for inntektsåret 2001 kr 75. Arbeidsgivaren kan for 2002 godtgjere slike utgifter trekk- og avgiftsfritt etter denne satsen.

3 Reiseutgifter ved besøk i heimen, trekkfri bilgodtgjering og fordel ved privat bruk av arbeidsgivar sin bil for inntektsåret 2002

3.1 Frådrag for reiseutgifter ved heimbesøk Den satsen som blir nytta når pendlarar får godkjent reiseutgifter ved besøk i heimen, jf. takseringsreglane post 3.3.1, skal for inntektsåret 2002 vere kr 1,40 pr. km inntil 35 000 km pr. år og kr 0,70 pr. km over 35 000 km pr. år. Arbeidsgivaren kan godtgjere slike utgifter trekk- og avgiftsfritt etter desse satsane. Skattedirektoratet kan heve satsane i inntektsåret ved prisauke.

3.2 Trekkfri bilgodtgjering Bilgodtgjering er berre trekkfri når godtgjeringa utbetalast for yrkes- eller tenestekøyring som kilometergodtgjering etter statens reiseregulativ (særavtale) (eller lågare) for inntil 4 000 km og for slik godtgjering for overskytande km som ikkje overstig kr 2,05 (kr 2,10 ved arbeidsstad i Tromsø). Det skal reknast arbeidsgivaravgift av all godtgjering over kr 2,05 (kr 2,10) også for dei fyrste 4 000 km.

3.3 Privat bruk av arbeidsgivar sin bil Fordelen ved privat bruk av arbeidsgivar sin bil som er stilt til disposisjon for arbeidstakar, sjablonmessig fastsett til 13 000 km pr. år (eller 1 083 km pr. månad) med tillegg av dei kilometrane arbeidstakaren brukar bilen mellom heim og arbeidsstad, skal takast med i grunnlaget for utrekning av forskottstrekk og arbeidsgivaravgift.

Fordelen skal for 2002 reknast etter følgjande satsar:

Prisklassar:	Kr pr. km:
Under kr 75 000	12,85
Kr 75 001 - 100 000	3,45
Kr 100 001 - 150 000	4,05
Kr 150 001 - 200 000	4,70
Kr 200 001 - 250 000	5,55
Kr 250 001 - 300 000	6,40
Over kr 300 000	7,00

For køyring mellom heim og arbeidsstad over 4 000 km pr. år, skal ein bruke ein sats på kr 1,40 pr. km.

Prisklassen blir fastsett ut frå opphaveleg listepris for bilen som ny. Opphaveleg listepris som ny er importøren sin rettleiande pris levert importsted-, medrekna avgifter og eventuelt ekstrautstyr. For bil som berre drivast med elektrisk kraft, nyttast satsen som ligg to prisklasser lågare enn den opphavelege listeprisen, men ikkje under lågaste sats. Opphalder arbeidstakaren seg i utlandet og bilen ikkje er anskaffa i Noreg, nyttast opphaveleg listepris som ny i opphaldslandet. Det kan krevjast framlagt dokumentasjon for denne listeprisen.

Når prisen på bilen, rekna på denne måten, er høgare enn kr 450 000, skal grunnlaget for trekk og avgift på årsbasis aukast med 10 prosent av den delen av listeprisen som overstig kr 450 000.

Reknar ein med at yrkeskøyringa blir meir enn 40 000 km i året, kan trekk og avgift reknast etter ein sats som ligg to prisklasser lågare enn den som følgjer av listeprisen, men ikkje under den lågaste satsen. I slike høve skal grunnlaget for trekk og avgift på årsbasis berre aukast med 10 prosent av den del av prisen som overstig kr 500 000.

4 Rimelege lån i arbeidstilhøve

Når arbeidsgivaren har gitt eller formidla lån i arbeidstilhøve til rimeleg rente, skal det trekkjast skatt og reknast arbeidsgivaravgift av rentefordelen. Fordelen er differansen mellom renta rekna etter normalrentesatsen og den faktisk påkomne renta. Frå 1. januar 2002 er normalrentesatsen 6,0 prosent. Rentefordelen skal fordelast på dei aktuelle månadene. Del av månad skal reknast som heil månad. Regelen gjeld også når slike lån til dømes er gitt til arbeidstakaren sin ektemake eller sambuar.

Rentefordelen ved eit kortsiktig mindre lån frå arbeidsgivar blir ikkje rekna som skattepliktig inntekt. Vilkåra er at lånet, da det blei gitt, ikkje var større enn 3/5 av grunnbeløpet i folketrygda (pr. 1. januar 2002 svarande til kr 30 816), og tilbakebetalingstida er høgst eitt år.

Skattekorta for 2002 er skrivne ut på grunnlag av likninga for 2000, der ein eventuell skattepliktig rentefordel er teken med.

Skattytarar som tek opp nye lån og med dette får vesentleg skattepliktig fordel, bør ta kontakt med likningskontoret for å få endra skattekortet.