Kjøpe og selje fiskebåt og fiskekvotar
Om frådrag og avskriving når du kjøper eller sel ein fiskebåt og/eller eit fiskeriløyve (fiskekvote).
Gjeld det meg?
Dette gjeld deg som er næringsdrivande og kjøper eller sel ein fiskebåt og/eller eit fiskeriløyve.
Eit fiskeriløyve er eit offentleg løyve til å delta i fisket, og det er knytt til fiskebåten med eigaren av fiskebåten. Eit fiskeriløyve kan til dømes vere ein deltakarrett, ein konsesjon eller ein strukturkvote.
Fiskeridirektoratet fastset årleg ein fiskekvote til dei fartøya som har eit fiskeriløyve. Fiskeriløyvet kan følgje med fiskebåten når han skal seljast.
Kjøpe fiskebåt og/eller fiskeriløyve
Som hovudregel skal du fordele frådraget for kostnaden du har hatt til kjøp av ein fiskebåt over fleire år. Du skal normalt ikkje frådragsføre kostnader til eit fiskeriløyve.
Merk at du kan få frådrag for strukturkvoten viss du skal selje han. Ta derfor vare på kjøpekontrakt, faktura og informasjon om kostpris og andre eventuelle kostnader du har hatt knytte til kjøpet. Bruk ID-nummeret frå Fiskeridirektoratet for å skilje løyva frå kvarandre.
Du må også fordele kostnader som til dømes provisjon eller gebyr du har hatt ved kjøpet.
Det kan vere vanskeleg å fordele kjøpesummen mellom fiskebåten og fiskeriløyvet. Viss fordelinga ikkje kjem fram av salsavtalen, kan du finne opplysningar i til dømes kjøpekontrakten, lånesøknaden, styreprotokollen eller hos skipsmeklaren.
Du skal føre inn verdien for kvart enkelt driftsmiddel under den aktuelle saldogruppa i næringsspesifikasjonen. Fiskeriløyve som ikkje er tidsavgrensa skal du normalt ikkje frådragsføre, med mindre løyvet openbert har gått ned i verdi.
Du skal avskrive strukturkvotane med den same summen kvart år så lenge løyvet varer:
- Strukturkvotar som er tildelte etter 1. januar 2007 kan avskrivast over 20 år.
- Strukturkvotar som er tildelte før 1. januar 2007 kan avskrivast over 25 år, rekna frå og med inntektsåret 2008.
Avskrivingstida på 20 eller 25 år gjeld samla sett for alle eigarane av strukturkvoten.
Du skal berre avskrive verdien av kvoten for den delen av året du har eigd han.
Rekn ut korleis du avskriv (Excel)
Døme:
Eigar A får tildelt ein strukturkvote 1. juli i år 1. Kostprisen for kvoten er 264 000 kroner.
Du kjøper kvoten av Eigar A 1. september i år 5 for 950 000 kroner.
Strukturkvoten blir avskriven over 20 år. Dette utgjer 240 månader frå den første månaden kvoten er tildelt Eigar A.
Eigar A eig kvoten i 50 månader: 6 månader i år 1 + 36 månader i år 2, 3 og 4 + 8 månader i år 5.
Avskrivinga for Eigar A per månad blir: 264 000 kroner (kostpris) / 240 månader = 1 100 kroner.
Du eig kvoten i 190 månader: 240 månader - 50 månader (eigartida til Eigar A).
Avskrivinga per månad blir: 950 000 kroner (prisen du har betalt) / 190 månader = 5 000 kroner.
Selje fiskebåt og/eller fiskeriløyve
Skattepliktig inntekt eller tap
Viss du sel ein fiskebåt med gevinst, er gevinsten skattepliktig inntekt. Du fører gevinsten som inntekt i næringsspesifikasjonen.
Du kan føre heile gevinsten som inntekt i salsåret, eller du kan velje å føre inntekta på gevinst- og tapskontoen til bedrifta slik at du fordeler gevinsten over fleire år.
Viss du sel ein fiskebåt med tap, kan du få frådrag for tapet.
Meirverdiavgift
Du må betale meirverdiavgift på inntekter du har når du sel ein fiskebåt, reiskap eller kvotar, men det er nokre unntak:
- Fiskebåtar på minst 6 meter eller lengre kan seljast utan meirverdiavgift dersom kjøparen er næringsdrivande.
-
Ved sal av fiskebåtar på mellom 6 og 15 meter, må du dokumentere fritaket med ei stadfesting frå skattekontoret på at kjøparen er registrert i Meirverdiavgiftsregisteret, og at kjøparen dei siste tolv månadene har omsett råfisk, sel, kval, tang eller tare over beløpsgrensa for registrering i Meirverdiavgiftsregisteret.
I tillegg må du få ei erklæring frå kjøparen om at fartøyet berre skal brukast til yrkesmessig fiske. For å få fritak for meirverdiavgift, må du sende ein søknad til Skatteetaten.
Du har sjølv ansvar for å vurdere om det skal bereknast meirverdiavgift ved salet.
Du må levere mva-melding og betale på vanleg måte.
Viss du sel eit fiskeriløyve med gevinst, er gevinsten skattepliktig inntekt. Du fører gevinsten som inntekt i næringsspesifikasjonen.
Du kan føre heile gevinsten som inntekt i salsåret, eller du kan velje å føre inntekta på gevinst- og tapskontoen til bedrifta slik at du fordeler gevinsten over fleire år.
Viss du sel eit fiskeriløyve med tap, kan du få frådrag for tapet.
Spesielt for deg som
Viss du sluttar heilt å bruke fiskebåten, må du vurdere om verksemda er avslutta. Når verksemda er avslutta, har du ikkje lenger rett til frådrag for avskriving av fiskebåten.
Viss verksemda som er avslutta er meirverdiavgiftspliktig, skal du slette registreringa i Meirverdiavgiftsregisteret.
Dersom du sel verksemda di til ein ny eigar, skal de ikkje betale meirverdiavgift på salet av verksemda. Hovudvilkåra er at du sel heile eller delar av verksemda, og at verksemda i hovudsak held fram under den nye eigaren. Meir om overdraging av verksemder i Merverdiavgiftshåndboken 6-14 § 6-14.
Viss du tar over din eigen fiskebåt for å bruke han privat etter at du har slutta med næringsfiske, skal du føre marknadsverdien av fiskebåten som inntekt i næringsspesifikasjonen.
Nærståande informasjon
Når du driv verksemd og eig din eigen fiskebåt, kan du ha krav på eit eige fiskarfrådrag, og du kan også få frådrag for utgifter du har hatt. Du må betale skatt av formuen på båten og fiskeriløyvet.