Oppteningsperiode
Gjeld oppteningsperiode for lønn og andre ytingar.
Om oppteningsperiode
I a-meldinga kan du gi opplysningar om oppteningsperiode for alle typar lønn og andre ytingar, men det er ikkje obligatorisk.
For ytingar der det er obligatorisk å oppgi «periode» kan du òg føre opp oppteningsperiode.
Dersom du gir opplysningar om oppteningsperiode, må både startdato og sluttdato for oppteningsperioden vere med i a-meldinga for den månaden.
Kvifor skal ein føre opp oppteningsperiode
- oppteningsperioden gir informasjon om når ei yting er opptent
- lønn og andre ytingar du oppgir i a-meldinga kan vere opptente i ein annan periode enn månaden du sender a-melding for
- NAV brukar opplysningane om oppteningsperiode når dei vurderer rettar og plikter
- fører du opp oppteningsperioden, slepp dei tilsette eller andre inntektsmottakarar å gi desse opplysningane til NAV sjølve
- med informasjon om oppteningsperiode blir timar som er knytte til beløp rett fordelte i Aa-registeret
Startdato og sluttdato
Når du oppgir ein oppteningsperiode, må startdatoen og sluttdatoen vere innanfor same rapporteringsmånad.
Dersom oppteningsperioden går over fleire månader, må du dele opp oppteningsperioden og beløpet. Du skal då føre opp den delen av ytinga som fell innanfor ein rapporteringsmånad saman beløpet som høyrer til.
Startdato for oppteningsperioden
Startdato for oppteningsperioden er datoen då ein byrja å utføre arbeidet, tenesta eller ytinga som det oppgitte beløpet er meint å dekkje.
Startdato for oppteningsperioden gjeld alltid frå og med den datoen som er oppgitt i a-meldinga.
Sluttdato for oppteningsperioden
Sluttdato for oppteningsperioden er datoen då ein slutta å utføre arbeidet, tenesta eller ytinga som det oppgitte beløpet er meint å dekkje.
Sluttdatoen for oppteningsperioden gjeld alltid til og med den datoen som er oppgitt i a-meldinga.
Døme med oppteningsperiode innanfor same kalendermånad
Ei servicebedrift skal gi opplysningar om lønn for ein av dei tilsette. Lønna er opptent i perioden 1. januar 2018 til 24. januar 2018. Det opptente beløpet er på 10 000 kroner.
A-melding for januar | |
Startdato for oppteningsperioden | 1. januar 2018 |
Sluttdato for oppteningsperioden | 24. januar 2018 |
Beløp | 10 000 kroner |
I tillegg fører dei opp andre obligatoriske opplysningar for månaden.
Døme med oppteningsperiode over fleire kalendermånader
Eit vaskeri skal føre opp lønn for ein av dei tilsette. Lønna er opptent frå 1. januar 2018 til 28. februar 2018. Det opptente beløpet er på 10 000 kroner fordelt på 50 prosent i januar og 50 prosent i februar.
A-melding for januar | |
Startdato for oppteningsperioden | 1. januar 2018 |
Sluttdato for oppteningsperioden | 31. januar 2018 |
Beløp | 5 000 kroner |
I tillegg fører dei opp andre obligatoriske opplysningar for månaden.
A-melding for februar | |
Startdato for oppteningsperioden | 1. februar 2018 |
Sluttdato for oppteningsperioden | 28. februar 2018 |
Beløp | 5 000 kroner |
I tillegg fører dei opp andre obligatoriske opplysningar for månaden.
Kva brukar vi opplysningane til
NAV brukar opplysningar om oppteningsperiode for å avgjere når ei yting er opptent. Opplysningane kan påverke rettar og plikter både for arbeidstakar og arbeidsgivar.