Kort om permittering

Før opp permittering dersom ein tilsett blir mellombels friteken for arbeidsplikt i samband med driftsinnskrenkingar eller driftsstans. Dette gjeld anten det er bestemt einsidig av arbeidsgivar eller etter avtale i det einskilde tilfellet.

Permittering skal førast opp uansett lengd, også dersom heile permitteringsperioden er innanfor arbeidsgivarperioden.

Skal du oppgi lønn eller ytingar til ein tilsett som er permittert, oppgir du det på same måte som du har gjort tidlegare, til dømes som fastlønn, timelønn eller annan inntekt. Det finst inga eigen beskriving for lønn utbetalt under permittering.

 

Er det obligatorisk

Ja, du må føre opp permittering for alle ordinære og maritime arbeidsforhold når tilsette er permitterte.

Du skal ikkje føre opp permittering for frilansar, oppdragstakar og personar som tek imot honorar eller for pensjon eller andre ytingar utanfor arbeidsforhold.

 

Kva for opplysningar skal du oppgi

Når du oppgir permitteringar skal kvar einskild registrering innehalde:

 

Permitteringsnemning

Før opp nemninga permittering.

 

PermitteringsID

PermitteringsID er ein identifikator for permitteringa.

Oppgi ein unik ID for kvar permittering, og bruk denne kvar gong du bekreftar permitteringa. Dersom den tilsette skal ha ny permittering på eit seinare tidspunkt, må du bruke ein ny ID. Bruker du same ID fleire gonger, blir opplysningane du har oppgitt på denne IDen tidlegare erstatta med nye opplysningar på same ID.

Brukar du eit lønns- eller personalsystem blir permitteringsID vanlegvis generert når du opprettar ei ny permittering.

 

 

Arbeid i permitteringstida

Du skal ikkje endre permitteringsprosenten dersom arbeidstakarane utfører arbeid mens dei er permittert.

• Arbeid over 6 veker
  Dersom ein tilsett er tilbake i ordinært arbeid i meir enn 6 veker blir permitteringa avbroten. Dei vekene arbeidstakaren har vore i jobb skal ikkje med i permitteringsperioden du fører opp i a-meldinga. Dersom den tilsette blir permittert på nytt etter å ha arbeidd i meir enn 6 veker, skal du føre opp dette som ei ny permittering. Du skal då føre opp ein ny permitteringsID og ny startdato.
  
  
• Arbeid under 6 veker
  Ved arbeid og kurs under 6 veker, opphøyrer ikkje permitteringa, og ho blir heller ikkje gradert. Du skal føre opp samla permittering med den same ID-en for heile perioden.
  
  Dersom den tilsette får lønn eller anna godtgjersle skal du føre opp inntekta med riktig inntektsnemning. Betaler du lønn per time skal du føre opp talet på timar som er knytt til desse pengane.
  
  
• Fiskeforedlings- og fiskeoljeindustri
  Det gjeld særskilde reglar innan fiskeforedlings- og fiskeoljeindustrien. I desse tilfella blir permitteringa rekna som avbroten dersom den tilsette er tilbake i ordinært arbeid i meir enn 26 veker.

Dersom du har sendt nytt permitteringsvarsel med ny permitteringsgrad, skal du føre opp ny permitteringsprosent og ny permitteringsID i a-meldinga. Sjå avsnittet om å endre permitteringsprosent.

 

Byte lønnssystem eller rekneskapsførar

Dersom du byter rekneskapsførar, må du ofte byte lønnssystem. Når du byter lønnssystem, må du flytte opplysningar frå eitt system til eit anna. Det kan du gjere på tre ulike måtar. Sjå ei nærare forklaring av korleis du byter lønnssystem.

 

Startdato på permittering

Startdatoen er den dagen du har fyrste lønnspliktdag for den tilsette. Startdatoen skal gjentakast på kvar a-melding så lenge permitteringa varer.

 

Døme

Berit sin arbeidsgivar permitterer dei tilsette den 3.april. Berit jobbar turnus. Den 3. april har ho fri, og hennar fyrste arbeidsdag er 5. april. Arbeidsgivaren oppgir 5. april som startdato for permitteringa i a-melding for april, og alle seinare a-meldingar så lenge ho er permittert.

 

Sluttdato på permittering

Før opp datoen permitteringa blir avslutta.

Du kan føre opp sluttdato fram i tid dersom datoen er kjend. Du må då ta oppatt denne i a-meldinga fram til den aktuelle sluttdatoen.

 

Frå ferie, sjukefråvær eller permisjon til permittering

Du skal ikkje rapportere tilsette som har ferie, sjukefråvær eller er i permisjon som permitterte før fyrste lønnspliktdag inntreff. Fyrste lønnspliktdag vil normalt vera etter avslutta ferie, sjukefråvær eller permisjon.

Dersom arbeidstakaren har gradert sjukmelding eller har gradert permisjon, så skal arbeidsgivar berre oppgi permittering i den stillingsprosenten vedkommande er forventa å jobbe i.  

 

Døme

Lise er sjukmeld når alle tilsette i firmaet ho jobbar i, blir permitterte med iverksetjingsdato 1. mai. Ho blir friskmeld og skulle vore tilbake på jobb 20. mai. Arbeidsgivaren fører opp 20. mai som startdato for permitteringa i a-meldinga for april og alle seinare a-meldingar så lenge ho er permittert.

Ola er 50% sjukmeldt når alle tilsette i firmaet han jobbar i blir permittert med startdato 1.april. Arbeidsgivaren oppgir 1.april som startdato for permitteringa og 50 som permitteringsprosent i a-meldinga for april og i alle seinare a-meldingar så lenge Ola er permittert. Dersom Ola blir friskmeldt til 100% arbeid innanfor den perioden det er behov for 100% permittering, så skal arbeidsgivar auke permitteringsprosenten tilsvarande frå friskmeldingsdatoen.

Hanne har ferie når alle tilsette i firmaet ho jobbar i blir permittert med startdato 1.februar. Hennar siste feriedag er 15.mars. Arbeidsgivaren oppgir 16.mars som startdato på permitteringa.

 

 

Frå permittering til permisjon

Dersom ein arbeidstakar som er permittert skal ut i permisjon, til dømes fødselspermisjon i permitteringsperioden, avsluttast permitteringa. Arbeidsgivar skal da rapportere opphøyr av permitteringa samstundes som han skal rapportere permisjon på den tilsette.  

Døme

Ivan er permittert frå sin arbeidsgivar. Den 20.april har Ivan rett på fødselspermisjon. Arbeidsgivaren oppgir sluttdato 19.april på permitteringa, og 20.april som startdato på permisjonen.

 

Permitteringsprosent

Oppgi kor mange prosent permitteringa utgjer av den avtalte stillingsprosenten til den tilsette. Ein tilsett kan vere heilt eller delvis permittert. Permitteringsprosenten skal vere over 0 (om du ikkje skal slette ein permittering) og ikkje meir enn 100.

 

Døme

Sunniva er tilsett i 80 prosent stilling. Ho blir 50 prosent permittert frå denne deltidsstillinga. Før opp 50 prosent som permitteringsprosent.

William blir permittert 2 dagar i veka dei neste fire månadene. Oppgi 40 prosent permittering dersom han har ei 100 prosent stilling.

 

Når skal du rapportere

Før opp permitteringa for den kalendermånaden permitteringa gjeld og ta opp att dette til permitteringa blir avslutta. 

 

Endre permitteringsprosent

Når du skal endre permitteringsprosent, sett sluttdato på den eksisterande permitteringsID-en dagen før endringa skjedde. Opprett deretter ein ny permitteringsID med ny permitteringsprosent og startdato den dagen endringa skjedde.

 

 

Rette feil

 

 

Slette ei permittering

Du kan slette ei feilrapportert permittering på to måtar.

1. Send inn ei ny a-melding der du set startdatoen og sluttdatoen for permitteringa til same dato og permitteringsprosenten til 0 prosent.
   
   Bruk den same permitteringsID-en som ved tidlegare feilrapportering(ar). Aa-registeret må eintydig kunne skilje mellom eindags permittering og feilrapportert permittering som skal slettast. Når ein set startdatoen lik sluttdatoen og permitteringsprosenten til 0 prosent, kan dette eintydig tolkast i registeret som ei sletting av opplysningar ein har rapportert tidlegare.
   
   
2. Send inn ei erstatningsmelding der den feilrapporterte permitteringa ikkje er med. Du må erstatte alle rapporteringsperiodar der permitteringa har blitt feilaktig rapportert.

 

Kva nyttar vi opplysningane til

Opplysningane om permitteringar i arbeidsforhold blir nytta til å oppdatere Aa-registeret. Aa-registeret blir nytta av NAV og andre offentlege instansar i oppgåveløysinga deira. Feil informasjon kan føre til feil vurderingar for dei som nyttar Aa-registeret.

Statistisk sentralbyrå (SSB) nyttar opplysningane til å avgjere kven som blir rekna som sysselsett.

Opplysningar om permittering blir overførte til Aa-registeret.