Kort om tilsetjingsform

Tilsetjingsforma viser kva tilknyting arbeidstakaren har i tilsetjingsforholdet. Tilsetjingsforma kan vere fast eller mellombels. Oppgi tilsetjingsforma som står i arbeidsavtalen til den tilsette.

Dersom arbeidstakaren har fast stilling, er arbeidsforholdet fortlaupande og tidsuavgrensa. For at ei fast stilling skal opphøyre må reglane om opphøyr av arbeidsforhold følgjast. Tilsetjingar skal som hovudregel vere faste for å skape stabile og føreseielege rammevilkår for begge partar i eit arbeidsforhold.

Viss arbeidsforholdet er mellombels, er det avtalt for ein bestemt tidsperiode eller for eit bestemt arbeid, og skal vere avtalt i kontrakten.

Typiske stillingar der det blir tilsett mellombels er

• sesongarbeid
• ekstrahjelp
• prosjektarbeid
• vikariat
• åremålsstillingar

Les meir om mellombelse tilsetjingar på nettsidene til Arbeidstilsynet

 

Døme på fast tilsetjingsform

Kine jobbar i ei administrativ stilling i ein kommune. Ho er fast tilsett i ei 100 prosent stilling i kommunen.

Janne arbeider i eit vikarbyrå. Ho er tilsett i ei 80 prosent stilling i dette byrået. Ho blir leigd ut i ei saksbehandlarstilling for ein periode på 6 månader. Janne er fast tilsett i ei 80 prosent stilling i vikarbyrået, sjølv om ho er utleid som saksbehandlar til eit midlertidig oppdrag. 

 

 

Fast tilsett som fungerer i ei mellombels stilling eller i eit vikariat

Ein arbeidstakar som har ei fast stilling kan i ein periode fungere i ei anna mellombels stilling eller i eit vikariat hos arbeidsgivar. Arbeidsgivar skal oppgi dette på ulike måtar i a-meldinga, avhengig av om vikariatet er i same undereining, eller om vikariatet er i ei anna undereining under same hovudeining. Er vikariatet i same undereining skal arbeidsgivar framleis oppgi den tilsette som fast tilsett. Men er det endring på yrkeskode og/eller lønn må dette endrast. Om vikariatet fører til at arbeidstakar skifter undereining, må det bli oppgitt permisjon frå den faste stillinga og eit nytt mellombels arbeidsforhold på vikariatet med ny startdato og arbeidsforholdsID.

 

Døme på mellombels tilsetjingsform

Knut jobbar på eit gartneri og har ein arbeidsavtale som varer frå april til juli. Knut jobbar på gartneriet kvart år. Dette er sesongarbeid som er avgrensa til berre ein del av året. Arbeidsgivar oppgir tilsetjingsforma til Knut som mellombels.

Anne er tilsett i ei prosjektstilling for å byggje opp eit fagsystem og gi arbeidsgivar råd og rettleiing i bruk av løysinga. Arbeidsavtalen går over 2 år og er tidsavgrensa. Arbeidsgivar oppgir tilsetjingsforma til Anne som mellombels.

 

Er det obligatorisk

Ja, du må oppgi tilsetjingsform for alle ordinære og maritime arbeidsforhold.

Du må ikkje oppgi tilsetjingsform for frilansarar, oppdragstakarar og personar som får honorar, og heller ikkje for pensjon eller andre ytingar utanfor arbeidsforholdet.

 

Når skal du rapportere

Du skal oppgi tilsetjingsform når du rapporterer arbeidsforholdet, og gjenta kvar månad til og med månaden du avsluttar arbeidsforholdet.

 

Endre tilsetjingsform

Dersom ein tilsett byter tilsetjingsform, kan du oppgi ny tilsetjingsform den månaden skiftet skjer.

Rette feil

 

Kva bruker vi opplysningane til

Opplysningar om tilsetjingsform for ordinære og maritime arbeidsforhold blir overførte til Aa-registeret. NAV distribuerer opplysningar om arbeidsforhold frå Aa-registeret til private og offentlege aktørar som har lov til å få desse. Døme på slike aktørar er Skatteetaten og Arbeidstilsynet. NAV bruker vidare opplysningane til statistikk over tilsetjingsforhold. 

Opplysningar om tilsetjingsform gjer at NAV kan tilpasse og effektivisere saksbehandlinga, arbeidsformidlinga og oppfølginga si av stønadsmottakarar.