Kort om forskotstrekk

Som arbeidsgivar er du ansvarleg for å rekne ut og gjennomføre forskotstrekk.

I a-meldinga skal du gi opplysningar om kor mykje du skal betale i forskotstrekk, og kor mykje du har trekt i forskotstrekk på kvar einskild inntektsmottakar.

Beløpet du oppgir å betale skal vere lik summen av forskotstrekka for alle inntektsmottakarane.

Sjå òg generell informasjon om forskotstrekk

 

Du skal markere lønn og andre ytingar

Når du fører opp lønn og andre ytingar i a-meldinga, skal du markere om dei er trekkpliktige eller ikkje.

 

Dette gjer du ved å markere:

• «ja» for trekkplikt
• «nei» for ikkje trekkplikt

Du finn ein nærare omtale av trekkplikt på kvar einskild lønn og andre ytingar.

I dei fleste lønnssystem blir dette markert automatisk når du vel type lønn eller andre ytingar for beløpa du oppgir.

 

Markering er ikkje det same som gjennomført trekk

Når du markerer trekkplikt, seier ikkje dette noko om at du faktisk har gjennomført trekk i ytinga, berre om ho er trekkpliktig eller ikkje.

Det kan vere ytingar som vanlegvis er trekkpliktige, men der du likevel ikkje gjennomfører trekket i ytinga.

Dette gjeld til dømes:

• når ein betaler ut feriepengar i ferieåret (trekkfritak gjeld ikkje ved kjeldeskatt på lønn)
• når inntektsmottakaren har frikort
• ved minstegrenser for forskotstrekk
• når ein betaler ut pensjon i desember (ikkje pensjonar med kjeldeskatt)

 

Forskotstrekk for kvar einskild inntektsmottakar

Du skal føre opp gjennomført forskotstrekk for kvar einskild inntektsmottakar. I somme tilfelle skal du òg føre opp ei nemning.

Du skal føre opp beløpet med minusteikn.

 

Nemning for forskotstrekk

 

Sum forskotstrekk å betale

Du skal føre opp summen av gjennomført forskotstrekk som ei eiga opplysning i a-meldinga. Beløpet skal vere likt det som er trekt og oppgitt for alle inntektsmottakarane og verksemder i den aktuelle a-meldinga.

Dette er også beløpet du skal betale, og du skal føre det opp som eit positivt beløp.

 

Kva skal med i forskotstrekket

• Trekkpliktig lønn og andre ytingar
  
  Trekkpliktige kontantytingar
  Gjeld trekkpliktige kontantytingar som til dømes lønn og pensjon.
  
  Trekkpliktige naturalytingar 
  Gjeld trekkpliktige naturalytingar som til dømes elektronisk kommunikasjon, bil og bustad.
  
  For naturalytingar skal du gjennomføre forskotstrekk så langt dei kontante ytingane rekk. Er forskotstrekket høgare enn dei kontante ytingane, skal du melde frå til skattekontoret. Skattekontoret skriv då ut forskotsskatt til inntektsmottakaren. Denne skal dekkje forventa skatt på naturalytinga.
  
  Trekkpliktig utgiftsgodtgjersle 
  Gjeld trekkpliktig utgiftsgodtgjersle som til dømes overskot på utgiftsgodtgjersle og private utgifter.
  
  
• Nokon ytingar som ikkje er trekkpliktige
  Dersom du gjer trekk i ei ytingar som ikkje er trekkpliktig skal du føre opp beløpet som forskotstrekk, sjølv om ytinga er markert med «Nei» for trekkplikt.
  
  Dette gjeld til dømes somme regulativ- og tariffbestemte godtgjersler og godtgjersler etter Skattedirektoratet sine forskotssatsar.
  
  
• Trekkpliktige ytingar du ikkje fører opp i a-meldinga
  Dersom du gjer trekk i ytingar som du ikkje skal føre opp i a-meldinga, skal du føre opp trekket som forskotstrekk.
  
  Dette gjeld til dømes for lønn og ytingar under grensa for opplysningsplikt, eller kor det er føretekeforskottstrekk i ytingar som rapporterast i andre ordningar utanfor a-ordninga.
  
  

Sjå òg korleis du reknar ut grunnlaget for forskotstrekk

 

Kva skal ikkje med i forskotstrekket

• Naturalytingar i utlandet
  Gjeld forskotstrekk i naturalytingar til inntektsmottakarar som verken er busett i Noreg eller mellombels oppheld seg her når dei får ytinga, og ytinga er for arbeid i teneste utført i utlandet.
  
  
• Trygdeavgift utland
  Gjeld trekk av trygdeavgift som skal betalast til NAV Medlemskap og avgift som forskotstrekk.
  
  
• Trekkpliktige ytingar frå skattefrie selskap, foreiningar og institusjonar som ikkje overstig 10 000 kroner
  Gjeld når summen av alle dei trekkpliktige ytingane til ein inntektsmottakar ikkje overstig 10 000 kroner i løpet av eit kalenderår. Betaler du meir enn 10 000 kroner, går heile beløpet inn i berekningsgrunnlaget for forskotstrekk.
  
  
• Forskotstrekk som ikkje overstig 100 kroner
  Når forskotstrekket for ein inntektsmottakar ikkje utgjer meir enn 100 kroner i kalendermånaden.
  
  
• Trekkpliktige ytingar som ikkje overstig 500 kroner
  Når summen av alle dei trekkpliktige ytingane til ein inntektsmottakar ikkje overstig 500 kroner i kalendermånaden.
  
  
• Trekkpliktige ytingar som ikkje overstig 1000 kroner
  Når summen av alle dei trekkpliktige ytingane til ein inntektsmottakar ikkje overstig 1 000 kroner i inntektsåret.

 

Når skal du rapportere

Du skal gi opplysningar om forskotstrekk i a-meldinga kvar månad du har gjennomført eit trekk.

 

Betaling

Arbeidsgivarar skal på eige initiativ betale forskotstrekk. Første frist for kalenderåret er den 15. mars og deretter den 15. annankvar månad. Når du skal betale forskotstrekket, må du summere beløpa for dei to månadene.

Sjå òg utfyllande informasjon om betaling av forskotstrekk

 

Rette feil

 

 

 

Kva brukar vi opplysningane til

Skatteetaten brukar opplysningane til å krevje inn og kontrollere gjennomført trekk.

Statistisk sentralbyrå (SSB) brukar opplysningane til statistikkføremål.