Kva er ei tilbakemelding 

Tilbakemeldinga (A03) inneheld eventuelle feil eller manglar (MAGNET/EDAG) du må rette, eller forhold du bør kontrollere om er rette. Ho inneheld òg informasjon om kva du skal betale av forskotstrekk, arbeidsgivaravgift, utleggstrekk og finansskatt på lønn, samt kontonummer og KID-nummer.

Sender du fleire a-meldingar for same månad, inneheld tilbakemeldinga ei oppsummering av a-meldingane for månaden.

Dersom tilbakemeldinga inneheld feilmeldingar, får du informasjon om

• kvar i a-meldinga feilen er
• kva som er feil
• forklaring av feilen

Merk!
Den automatiske kontrollen sjekkar informasjonen opp mot reglane våre (forretningsreglar). I kontrollen oppdagar vi berre feil eller manglar som bryt med desse reglane.

Viss du for ein inntektsmottakar til dømes har oppgitt negativt beløp på timelønn, 0 i antal kilometer på trekkfri bilgodtgjersle eller ein stillingsprosent som ikkje samsvarer med arbeidstakaren sin arbeidsavtale, vil ikkje den automatiske kontrollen oppdage dette i a-meldinga. 

Sjå oversikta over feilmeldingar (MAGNET/EDAG)

 

 

Tilbakemelding for to månader

Har du sendt ei a-melding for ein månad tilbake i tid, får du tilbakemelding for to månader.

 

 

Kvar finn du tilbakemeldinga

• Har du levert a-meldinga direkte i Altinn (A01) finn du tilbakemeldinga i "Innboks" i Altinn.
  
  
• Har du levert a-meldinga frå skatteetaten.no finn du tilbakemeldinga i oversikta over leverte a-meldingar. Du finn og tilbakemeldinga i "Innboks" i Altinn.
  
  
• For deg som har sendt inn a-melding frå eit system (A02). Dei fleste som sender frå system, får tilbakemeldinga presentert i systemet. I tillegg finn du tilbakemeldinga i "Innboks" i Altinn i XML-format eller som ZIP-fil. Har du spørsmål om tilbakemeldinga i ditt system, må du kontakte systemleverandøren din.
  
  
• Unngå å sende ei ny a-melding før du har fått tilbakemelding på den førre a-meldinga du sende.
  
  
• Viss du ikkje får tilbakemelding med det same, kan det vere forseinkingar ved utsending. Sjå etter att etter ei stund om du har fått tilbakemeldinga. Dersom det går fleire timar utan at du har fått tilbakemelding, bør du kontakte systemleverandøren dersom du nyttar lønnssystem, eller kontakt a-ordninga.

 

Alvorsgrad på feilmeldingar (MAGNET/EDAG)

Feil eller manglar i a-meldinga har tre alvorsgrader:

1. Avvising = a-meldinga er ikkje levert.
   A-meldinga er ikkje levert eller teken imot hjå oss. Du må rette feilen innan fristen for å levere a-melding i kalendermånaden du har fått feilmeldinga.
   
   
2. Omgåande = a-meldinga er levert med feil.
   A-meldinga inneheld feil eller manglar du må rette opp. Du må rette feilen innan fristen for å levere a-melding i kalendermånaden du har fått feilmeldinga.  
   
   
3. Retningslinje = a-meldinga er levert med opplysningar som kan vere feil.
   A-meldinga er levert med opplysningar som kan vere feil. Dersom det er feil, må du rette opp feilen innan fristen for levering av a-melding i kalendermånaden du har fått feilmeldinga.

Sjå oversikta over feilmeldingar (MAGNET/EDAG)