Kort om finansskatt på lønn

Finansskatt på lønn er ein skatt på lønnsgrunnlaget i finanssektoren. Finansskatten utgjer 5 prosent av lønnsgrunnlaget i verksemda. 

I a-meldinga skal du oppgi sum for finansskatt på lønn for heile verksemda.

Dersom du rapporterer for fleire undereiningar i den same a-meldinga, skal du føre opp totalsummen for alle undereiningane.

Les meir om finansskatt

 

Kven skal betale finansskatt

Finansskatten omfattar i utgangspunktet alle arbeidsgivarar med tilsette som utfører aktivitetar  som kjem inn under næringshovudområde K i Statistisk sentralbyrå sin standard for næringsgruppering (SN2007).

Det vil seie:

• finansieringsverksemd
• forsikringsverksemd og pensjonskasser, unnateke trygdeordningar som ligg under offentleg forvalting
• tenester knytte til finansierings- og forsikringsverksemd

Ein skal vurdere aktiviteten ut frå dei rammene som er gitt for dei ulike næringsgruppene slik det kjem fram i SN 2007.

Det er den faktiske aktiviteten som er avgjerande, ikkje registreringa i Einingsregistret.

 

Kven er unnatekne frå finansskatt

• Selskap utan tilsette
• Arbeidsgivarar der lønn og andre ytingar knytte til finansiell aktivitet innanfor næringshovudområde K, utgjer mindre enn 30 prosent av dei totale lønnskostnadene til arbeidsgivaren
• Arbeidsgivarar med finansielle aktivitetar innanfor næringshovudområde K, der lønnsdelen og andre ytingar knytt til meirverdiavgiftspliktig, finansiell aktivitet utgjer meir enn 70 prosent av arbeidsgivaren sine samla lønnskostnader knytte til finansielle aktivitetar

 

Korleis rekne ut finansskatt på lønn

Grunnlaget for å rekne ut finansskatt på lønn er det same som verksemda sitt grunnlag for å rekne ut arbeidsgivaravgift. Det skal ikkje reknast finansskatt av lønn mv. som omfattast av Svalbardskattelova.

Du skal føre opp summen av finansskatt på lønn som ei eiga opplysning i a-meldinga. Ein skal ikkje oppgi utrekningsgrunnlaget.

Ved refusjon av sjukepengar med meir skal du redusere grunnlaget for finansskatt og grunnlaget for ordinær arbeidsgivaravgift tilsvarande refusjonen. Sjå meir under arbeidsgivaravgift - avgiftsgrunnlag punkt 3 og fritak for arbeidsgivaravgift når arbeidsgivar forskotterer sjukepengar og andre trygdeytingar.

Grunnlaget for ekstra arbeidsgivaravgift skal ikkje med i grunnlaget for finansskatt.

 

Summen for finansskatt på lønn skal vere lik:

Arbeidsgivaravgiftsgrunnlaget gonga med skattesatsen for finansskatt på 5 prosent.

 

Døme

Dei samla arbeidsgivaravgiftspliktige lønnskostnadene til verksemda er 30 millionar kroner. Av dette er 20 millionar kroner knytte til ikkje-meirverdiavgiftspliktig, finansiell aktivitet.

Summen for finansskatt på lønn er 30 millionar kroner x 5 prosent, som er lik 1,5 millionar kroner.

 

Verksemder som driv ikkje-økonomisk aktivitet i EØS-rettsleg forstand

Arbeidsgivarar som driv både økonomisk og ikkje-økonomisk aktivitet kan velje å berekne finansskatt på lønn berre for den delen av lønn og andre ytingar som knyter seg til den økonomiske aktiviteten til verksemda.

Dette krev at arbeidsgivaren har eit klart rekneskapsmessig skilje mellom lønn og andre ytingar knytt til høvesvis ikkje-økonomisk aktivitet og økonomisk aktivitet, slik at det er mogeleg å kontrollere kor stor del av lønnskostnadene som knyter seg til dei to aktivitetane. Det må då etablerast ei kostnadseining for lønnskostnadene for den ikkje-økonomiske aktiviteten til verksemda. Arbeidsgivaren må utarbeide spesifikasjonar av lønnskostnaden for den ikkje-økonomiske verksemda.

Lønnskostnader knytte til sentrale administrative fellestenester skal fordelast mellom den ikkje-økonomiske og den økonomiske aktiviteten.

 

Døme

Dei samla arbeidsgivaravgiftspliktige lønnskostnadene til verksemda er 30 millionar kroner. 20 millionar kroner av lønnskostnadene er knytte til ikkje-meirverdiavgiftspliktig, finansiell aktivitet, medan 10 millionar kroner er knytte til ikkje-økonomisk aktivitet i EØS-rettsleg forstand.

Det er oppretta eit rekneskapsmessig skilje mellom den økonomiske aktiviteten og den ikkje-økonomiske aktiviteten.

Summen for finansskatt på lønn er 20 millionar x 5 prosent, som er lik 1 millionar kroner.

 

Kva for opplysningar skal du oppgi

Beløp

x kroner

 

Beløp

Oppgi sum for finansskatt på lønn for heile verksemda.

Dersom du rapporterer for fleire verksemder i den same a-meldinga, skal du føre opp totalsummen for alle verksemdene.

 

Når skal du rapportere

Du skal oppgi finansskatt på lønn i a-meldinga den kalendermånaden du betaler ut lønn og andre ytingar.

 

Rette feil

 

Kva brukar vi opplysningane til

Skatteetaten brukar opplysningane for å fastsetje finansskatt på lønn.

Statistisk sentralbyrå (SSB) brukar opplysningane til statistikkføremål.