No er det enklare å sende a-meldinga for deg utan lønnssystem

Du kan bruke ei ny og enklare løysing neste gong du skal sende a-meldinga. Den nye løysinga erstattar a-meldingskjemaet (A01) i Altinn. Du finn den nye løysinga her: A10 – Direkte rapportering av a-melding.

Pensjon eller andre ytingar

Oppdatert: 27.04.2023

For personar som tek imot pensjon eller andre ytingar og som ikkje er i eit arbeidsforhold eller oppdrag. Gjeld også einskilde utbetalingar til næringsdrivande.

Kort om pensjon eller andre ytingar

Dersom du betaler ut pensjon eller ei anna yting/godtgjersle til ein person der ytinga ikkje er knytt til eit arbeidsforhold eller oppdrag, skal dette givast opp som pensjon eller andre ytingar utanfor arbeidsforhold. Dette gjeld òg i dei tilfella der utbetalingar til næringsdrivande skal givast opp i a-meldinga.

Arbeidsforholdet blir ikkje registrert i Aa-registeret.

Merk!
Dersom du skal føre opp utbetalingar til ein person som er registrert med ein av dei andre arbeidsforholdstypane, skal du ikkje bruke «pensjon eller andre ytingar utanfor arbeidsforhold» i tillegg. Dette gjeld til dømes utbetalingar til ein som er tilsett og som også tek imot pensjon. Utbetalingar til pensjon og andre ytingar kjem då fram av det du rapporterer for kontantytingar.

Det er viktig at du fører opp rett type arbeidsforhold. Ønskjer du meir informasjon, kan du sjå vel rett type arbeidsforhold.

Kva for opplysningar skal du oppgi

Du skal berre oppgi informasjon om type arbeidsforhold, aldri andre arbeidsforholdsopplysningar.

ArbeidsforholdsID	Aldri
Startdato på arbeidsforholdet	Aldri
Sluttdato på arbeidsforholdet	Aldri
Årsak til sluttdato	Aldri
Yrkeskode	Aldri
Talet på timar per veke som svarar til ei full stilling	Aldri
Stillingsprosent	Aldri
Siste dato for endring av stillingsprosent	Aldri
Avlønningstype	Aldri. Utgår i 2019.
Arbeidstidsordning	Aldri
Siste lønnsendringsdato	Aldri
Tilsetjingsform	Aldri
Lønnsansinitet	Aldri
Lønnstrinn	Aldri

Er det obligatorisk

Ja, det er obligatorisk dersom du leverer a-melding direkte i Altinn (A01) eller frå eit lønnssystemet der du må gi opplysningar om type arbeidsforhold.

Når skal du rapportere

Kor ofte?
Dersom du fører opp type arbeidsforhold pensjon eller andre ytingar utanfor arbeidsforhold, skal du føre opp dette kvar månad det er utbetalingar.
Kor seint?
Dersom du fører opp type arbeidsforhold pensjon eller andre ytingar utanfor arbeidsforhold, skal dette førast opp seinast innan rapporteringsfristen for månaden utbetalinga er gjort.

Opplysningar om føderåd skal du levere seinast den 5. januar i året etter kalenderåret.

Opplysningar om lott eller part ved fiske- eller fangstverksemd skal leverast for desember det året inntekta blei tent, når utbetalinga skjer etter årsskiftet. Desse opplysningane skal leverast seinast 20. februar året etter inntektsåret. Fristen for betaling av arbeidsgivaravgift og skattetrekk er då 15. Mars.

Døme på når du skal velje dette

Vel pensjon eller andre ytingar for:

Tilsette på andre tiltak enn lønnstilskot frå NAV
Til dømes arbeidspraksis i ordinær eller skjerma verksemd. Lønn og anna godtgjersle som verksemda har betalt ut, må rapporterast.

Arbeidsforhold som verken er ordinært eller maritimt arbeidsforhold eller eit frilansar-/oppdragsforhold

Fiskar og fangstmann som er teken opp i manntal (fiskarmanntal)

Føderåd / kår
Når den som kjøper fast eigedom gjer opp for kjøpesummen på den måten at seljaren får heil eller delvis betaling i form av framtidige årlege ytingar (avgrensa til mottakaren si levetid), som dels kan vere naturalytingar, mellom anna burett, ligg det føre føderåd (kår), og ikkje vanleg underhald.

Lottakar og reiar i stilling om bord på fiske- eller fangstfartøy

Oppdrag til utanlandsk oppdragstakar og arbeidstakarar på oppdraget
Den som gir oppdrag til ein utanlandsk oppdragstakar på land eller kontinentalsokkelen skal rapportere oppdraget og arbeidstakarane som arbeider på oppdraget i Oppdrags- og arbeidsforholdsregisteret. Opplysninga skal ikkje rapporterast i a-meldinga.

Plikta gjeld for norske og utanlandske næringsdrivande og for det offentlege. Privatpersonar har inga plikt til å gi opplysningar.

Oppmuntringspengar
Arbeidstakarar som deltek i arbeidstreningstiltak for yrkeshemma, når lønna er definert som mottak av oppmuntringspengar. Til dømes varig tilrettelagt arbeid.

Pensjon
Ytingar til pensjonistar som ikkje har eit arbeidsforhold.

Utbetalingar frå lønnsgarantifondet
Konkursbu som betaler ut uteståande lønn til arbeidstakarar i eit føretak som har gått konkurs og har fått dekning frå lønnsgarantifondet.

Lønn til tilsette som har slutta (feriepengar, etterbetalingar o.a.)

Kursdeltakarar som får refusjon for tapt arbeidsforteneste
Gjeld kursdeltakarar som ikkje er tilsette hjå kursansvarleg. Til dømes medlemsorganisasjonar som arrangerer kurs for medlemmene, og der deltakarane har permisjon utan lønn frå arbeidsgivarane. Lønn (tapt arbeidsforteneste) og annan godtgjersle som kursansvarleg har utbetalt, må rapporterast i a-ordninga.

Personar som berre mottar utgiftsgodtgjerlse
Personar som ikkje mottar lønn, honorar a.o., men berre utgiftsgodtgjerlse skal du gje opp med arbeidsforholdstype «Pensjonar og andre ytingar», eller la være å gje opp type arbeidsforhold.

Personar som er på introduksjonsordninga for flyktningar
Personar som er på introduksjonsordninga for flyktningar skal du gje opp med arbeidsforholdstype «Pensjonar og andre ytingar», eller la være å gje opp type arbeidsforhold.

Personar som er vitnar i saker i domstolane
Personar som er vitnar i saker i domstolane skal du gje opp med arbeidsforholdstype «Pensjonar og andre ytingar», eller la være å gje opp type arbeidsforhold.

Personar som verken er tilsette eller har oppdrag for deg
Har du utbetalingar til personar som verken er tilsette eller har oppdrag for deg, men som er rapporteringspliktige i a-ordninga, skal du rapportere dette utan å oppgi arbeidsforholdopplysningar.

Døme på dette kan vere utbetaling av reisegodtgjersle til ein person som har vore på jobbintervju.

Endre type arbeidsforhold

Dersom type arbeidsforhold er endra sidan sist a-melding må du oppgi ny type arbeidsforhold i den neste a-meldinga du skal sende. Korleis du endrar kjem an på type arbeidsforhold du byter frå og type arbeidsforhold du byter til. Du må velje mellom ein av tre alternative måtar å endre på.

Sjå korleis du byter frå ein type arbeidsforhold til ein annan