Kjeldeskatt på lønn
Gjeld kjeldeskatt på lønn og korleis du som arbeidsgivar skal gjennomføre riktig skattetrekk og rapportere riktig.
Kva er kjeldeskatt på lønn?
Kjeldeskatt på lønn er ei skatteordning for utanlandske arbeidstakarar med kortare arbeidsopphald i Noreg, og første året arbeidstakaren er skattemessig busett i Noreg.
For deg som arbeidsgivar betyr kjeldeskatt på lønn at du skal trekkje skatt etter ein fast prosent og rapportere både lønn og skattetrekk til Skatteetaten. Du skal berekne og trekkje kjeldeskatt av all lønn og alle godtgjersler som er skattepliktige for arbeidstakaren. For arbeidstakaren er skatten gjort opp i det du rapporterer lønn og trekk, det er derfor viktig at du rapporterer riktig.
Skattekort for kjeldeskatt på lønn
Skattekortet til arbeidstakarar i kjeldeskatteordninga er spesielt merkt "kjeldeskatt på lønn" under tilleggsopplysningar. Dersom denne opplysninga ikkje blir vist i lønnssystemet ditt, må du skaffe deg tilgang til den informasjonen på annan måte før du køyrer lønn.
For arbeidstakarar som har skattekort merkt "kjeldeskatt på lønn", skal du trekkje ein fast skatteprosent alle månader i året. Kjeldeskattekortet har likt trekk i 12 månader. Det er ingen trekkfrie månader eller halvt trekk før jul.
Dersom arbeidstakaren har eit skattekort for kjeldeskatt på lønn på det tidspunktet feriepengar skal utbetalast, skal du trekkje skatt etter satsen på skattekortet. Feriepengane kan ikkje utbetalast trekkfritt i desse tilfella.
Sjå også Kjeldeskatt på lønn – spesielt om skattetrekk i feriepengar.
For arbeidstakarar på nettolønnsordning, skal du rekne om nettolønna til bruttolønn ved å bruke skattesatsen i skattekortet og leggje inn tabellnummer "0000" i feltet for oppgrossingstabell når du rapporterer i a-meldinga.
Arbeidsgivar er ansvarleg for riktig rapportering
For arbeidstakarar i kjeldeskatteordninga er det arbeidsgivar som har ansvaret for å fastsetje inntekt og berekne skatt. Du fastset inntekta og bereknar skatten for arbeidstakarane dine i kjeldeskatteordninga ved å rapportere i a-ordninga.
Sidan skatten til arbeidstakaren er gjort opp med ein gong du rapporterer inntekter og forskottstrekk i a-meldinga, må du sjekke nøye at trekket og grunnlaget for trekket er riktig. Sjå meir om korleis du rapporterer under "Skattegrunnlag og kjeldeskatt".
Korleis berekne riktig grunnlag for trekk
Det er nokre skilnader i korleis du bereknar grunnlaget for trekk i og utanfor kjeldeskatteordninga. Dette avheng av kva slags ytingar arbeidstakaren mottar.
Dette skal du berekne kjeldeskatt av:
- honorar, godtgjersle, gratiale og liknande ytingar til utanlandske styreleiarar eller styremedlemmer i norske selskap
- lønn (kontantytingar, honorar, godtgjersler med meir) for arbeid utført i Noreg, inkludert feriepengar
Du skal ikkje gjere frådrag i berekningsgrunnlaget for trekk for pensjonsinnskott og fagforeiningskontingent som du avkortar i arbeidstakaren si inntekt.
Dekning av meirkostnader for pendlarar
Har du arbeidstakarar i kjeldeskatteordninga som er pendlarar og du dekkjer meirkostnadene deira ved opphald utanfor heimen og besøksreiser, skal alt du dekkjer – heile beløpet – inngå i grunnlaget for kjeldeskatt. Du skal rapportere heile beløpet du dekkjer som trekkpliktig, og du skal trekkje skatt etter satsen på skattekortet på heile beløpet.
Inntektsskildringa for trekkfrie pendlargodtgjersler kan ikkje brukast når du rapporterer slike ytingar på ein arbeidstakar i kjeldeskatteordninga.
Utgiftsgodtgjersler, refusjonar og naturalytingar
Utgiftsgodtgjersler, refusjonar og naturalytingar skal vurderast etter ordinære skattereglar. Unntaket er dekning av pendlarkostnader, sjå "Dekning av meirkostnader for pendlarar".
Utgiftsgodtgjersler, refusjonar og naturalytingar skal inngå i grunnlaget som du bereknar og trekkjer kjeldeskatt av dersom ytingane blir rekna som skattepliktig fordel for arbeidstakar.
Dersom du som arbeidsgivar dekkjer kostnader som er pådratte i direkte samanheng med arbeid, som til dømes meirkostnader ved opphald utanfor heimen i samband med tenestereise/yrkesreise, skal berre eit eventuelt overskott inngå i grunnlaget for kjeldeskatt.
Den delen av godtgjersla som ikkje gir overskott, skal ikkje inngå i grunnlaget for kjeldeskatt. Du skal ikkje trekkje skatt av denne delen og rapporterer den som trekkfri.
Den delen av godtgjersla som gir overskott, skal du rapportere som trekkpliktig, og du skal trekkje skatt av overskottet etter satsen på skattekortet.
Dersom du som arbeidsgivar dekkjer kostnader for arbeidstakaren som er private utgifter, som til dømes reiser til og frå jobb, skal heile beløpet inngå i grunnlaget for kjeldeskatt.
Du skal rapportere heile beløpet du dekkjer som trekkpliktig, og du skal trekkje skatt etter satsen på skattekortet på heile beløpet.
Dette skal du ikkje berekne kjeldeskatt av
Sjølv om du skal rapportere alle lønnsytingar i a-meldinga, er det enkelte ytingar som ikkje er skattepliktige for arbeidstakarar i kjeldeskatteordninga. Slike ytingar skal du heller ikkje trekkje kjeldeskatt av.
Dekning av kostnader som ikkje gir overskott
Når du dekkjer kostnader som er pådratte i direkte samanheng med arbeid, skal den delen av slik godtgjersle som ikkje gir overskott ikkje inngå i grunnlaget for kjeldeskatt. Du skal ikkje trekkje skatt av denne delen.
| Yting | Beløp | Inngår i grunnlaget for kjeldeskatt | Inngår i grunnlaget for skatt etter ordinær skatteordning |
| Lønn, kontantytingar | 400 000 | 400 000 | 400 000 |
| Naturalytingar, fri bustad | 72 000 | 72 000 | 0 |
| Utgiftsgodtgjersle, dekning av heimreise | 10 000 | 10 000 | 0 |
| Utgiftsgodtgjersle, dekning av tjenestereise | 20 000 | 0 | 0 |
Lønn for arbeid utført i utlandet
Ytingar for arbeid utført i utlandet skal ikkje inngå i grunnlaget for kjeldeskatt. Du skal ikkje trekkje skatt av slike ytingar. Hugs å oppgi oppteningsland når du rapporterer slike ytingar i a-meldinga.
Døme på rapportering (sjå skjermbildet og tekst nedanfor).
| Yting | Beløp | Inngår i grunnlaget for kjeldeskatt |
| Lønn (kontantlønn) opptent i Norge | 400 000 | 400 000 |
| Lønn (kontantlønn) opptent Sverige | 50 000 | 0 |
| Utgiftsgodtgjersle, flyttegodtgjersle | 10 000 | 0 |
| Naturalytingar, fri bil i Sverige | 5 000 | 0 |
Skattesats
Skattesatsen i kjeldeskatteordninga er 25 prosent. Arbeidstakarar som ikkje er medlem i norsk folketrygd, betalar ein lågare sats. Informasjon om kva sats du skal bruke finn du i skattekortet til arbeidstakaren.
Dette kan også påverke om du skal berekne arbeidsgivaravgift av lønn og andre godtgjersler.
Skattesatsar og arbeidsgivaravgift for kjeldeskatt på lønn
Rette feil
| MAGNET_EDAG-173 Feil i forskotstrekk |
| MAGNET_EDAG-277 Oppgitt forskotstrekk å betale er feil |
| MAGNET_EDAG-278 Forskotstrekk for inntektsmottakar er feil |
Det er du som er ansvarleg for at fastsetjinga og skattetrekket er rett og at arbeidsgivaravgifta er riktig berekna. Her finn du informasjon om korleis du rettar rapporteringa:
