Kort om skatte- og avgiftsregelen

Svalbard er eit eige skattleggingsområde. Alle som tek imot lønn eller andre ytingar for arbeid eller pensjon på Svalbard, skal betale skatt til Svalbard etter lønnstrekkordninga.

Lønnstrekkordninga omfattar i hovudsak

• lønn og anna godtgjersle for arbeid og oppdrag i og utanfor tenesteforhold, mellom anna honorar, provisjonar o.a.
• styrehonorar o.l.
• naturalytingar og overskot på utgiftsgodtgjersler
• vederlag ved opphøyr av arbeidstilhøve
• pensjon, uføretrygd, føderåd eller livrente som ledd i pensjonsordning i arbeidstilhøve når mottakaren er skattemessig busett på Svalbard (opphald over 12 månader)

Du skal bruke skatte- og avgiftsregelen for Svalbard for inntektsmottakarar som

• er busette på Svalbard og tek imot lønn og andre ytingar for arbeid eller pensjon
• ikkje er busette, men har eit samanhengande opphald over 30 dagar og tek imot lønn eller andre ytingar for arbeid

Det skal foretas trekk i alle utbetalingar av lønn - også i feriegodtgjersle, lønn i ferien og lønn i desember. I tillegg til lønn og andre ytingar, må du markere forskotstrekket og frådrag med Svalbard. Du må gi opplysningar om opphaldet inntektsmottakaren har. Arbeidsgivaravgifta må du markere med eigen utrekningskode for Svalbard.

 

Ytingar frå det offentlege

I sjukepengar, fødselspengar, adopsjonspengar og dagpengar under arbeidsløyse som blir utbetalt til ein inntektsmottakar busett på Svalbard, skal det trekkjast skatt og trygdeavgift etter reglane for lønnstrekk. Det gjeld òg når mottakaren av ytingane oppheld seg på fastlandet. Det er ein føresetnad at opphaldet på Svalbard varer samanhengande i minst 30 dagar, og at vedkomande var i aktivt arbeid på Svalbard då retten til utbetaling oppstod.

 

Lønn for arbeid på fastlandet eller i utlandet

Personar som er skattemessig busette på Svalbard, er ikkje skattepliktige til Svalbard for lønn for arbeid på fastlandet eller i utlandet. Dette gjeld til dømes arbeid i ferie, under permisjon eller militærteneste, dersom lønna blir skattlagd på det norske fastlandet eller i ein annan stat.

Les meir om skattereglane for Svalbard i Skatte-ABC

Les meir om lønnstrekkordninga på Svalbard

 

Samanhengande opphald over 30 dagar

Dersom ein person, som ikkje er busett på Svalbard, oppheld seg på Svalbard i meir enn 30 dagar, utan å forlate øya, reknar vi det som eit samanhengande opphald. Dette gjeld òg opphald som går over eit årsskifte.

Slik reknar du ut opphaldet:

• tel opp talet på samanhengande dagar
• ikkje inkluder reisedagar til og frå
• reiser bort frå Svalbard bryt av det samanhengande opphaldet, og teljinga startar på nytt

Dersom ein person arbeider på Svalbard i 14 dagar, tek ei helg på fastlandet, og deretter arbeider 20 dagar på Svalbard, er dette to opphald på under 30 dagar. Du skal då ikkje bruke skatte- og avgiftsregelen for desse periodane. 

 

 

Kva for opplysningar skal du oppgi

Du skal føre opp informasjonen om opphaldet til inntektsmottakaren på Svalbard minst ein gong per opphald. Du kan gjenta opplysningane om opphaldet kvar gong du sender a-melding så lenge inntektsmottakaren opphalder seg på Svalbard. I tillegg til andre obligatoriske opplysningar skal du føre opp:

OpphaldsID	unik ID
Startdato	frå dato
Sluttdato	til dato
Opphaldsskildring	Svalbard

 
Startdatoen og sluttdatoen er for det samanhengande opphaldet.

 

Ytingar som skatte- og avgiftsregelen gjeld for

Du kan bruke skatte- og avgiftsregelen på dei fleste typar lønn og andre ytingar.

Når inntektsmottakaren oppfyller vilkåra skal du markere ytinga med skatte- og avgiftsregelen «Svalbard».

Sjå oversikta over ytingar som skatte- og avgiftsregelen gjeld for

 

Kva med forskotstrekket

Dersom du har brukt skatte- og avgiftsregelen på lønn og andre ytingar, skal du òg markere forskotstrekket med «Svalbard». Dette gjeld lønnstrekket som er gjort av lønn, andre ytingar og pensjon som er opptent på Svalbard.

Her finn du satsane som gjeld for lønnstrekk og trygdeavgift til Svalbard. Den årlege meldinga om skatt og skattetrekk på Svalbard, Jan Mayen og bilandande gir nærmare informasjon om korleis du skal gjennomføre trekket.

 

Kva med frådraget

Dersom du har brukt skatte- og avgiftsregelen på lønn og andre ytingar og arbeidstakaren kjem inn under lønnstrekkordninga på Svalbard, hugs og gi opp desse frådraga med riktig nemning for Svalbard:

• Fagforeiningskontingent Svalbard
• Premie til pensjonsordningar Svalbard
• Premie til fond og trygd – Svalbard
• Brakkeleige – Svalbard

 

Kva med arbeidsgivaravgifta

Sjå ein eigen omtale av arbeidsgivaravgift for lønnstrekk på Svalbard under punktet om andre næringar.

Plikta til å berekne ekstra arbeidsgiveravgift på lønnsytingar over 850 000 kroner gjeld ikkje for lønnsytingar til arbeidstakarar i lønnstrekkordninga på Svalbard og arbeidstakarar på Jan Mayen eller bilandene. 

 

Rette feil

 

Kva brukar vi opplysningane til

NAV brukar opplysningar om lønn og andre ytingar til å rekne ut dagpengar og for å kontrollere ytingar som sjukepengar, foreldrepengar, uføretrygd og bidragsforskot.

Skatteetaten nyttar opplysningane til å sikre at inntektsmottakarar på Svalbard blir skattlagde etter lønnstrekkordninga på Svalbard.

Statistisk sentralbyrå (SSB) nyttar opplysningane til statistikkføremål.