Elektronisk kommunikasjon – utgiftsgodtgjersle
Gjeld fordel ved elektronisk kommunikasjon når den blir dekt gjennom utgiftsgodtgjersle.
Kort om elektronisk kommunikasjon – utgiftsgodtgjersle
Før opp fordel ved elektronisk kommunikasjon (EK-tenester) når det blir dekt som ei utgiftsgodtgjersle.
Dette gjeld til dømes:
- fasttelefon
- mobiltelefon
- fasttilgang til breiband
- mobil tilgang til datakommunikasjon, til dømes via trådlause nett
Arbeidsgivaren si dekning av kostnader til å etablere/installere EK-tenester kjem inn under sjablongregelen.
Kva for opplysningar skal du oppgi
| Beløp | x kroner |
| Type lønn eller yting | utgiftsgodtgjersle, elektronisk kommunikasjon |
| Trekkplikt | ja |
| Grunnlag for arbeidsgivaravgift | ja/nei |
| Skatte- og avgiftsregel | dersom aktuelt |
| Tilleggsinformasjon | - |
Beløp
Før opp den skattepliktige fordelen når du faktisk gjennomfører utbetalinga til arbeidstakar.
Dersom total dekning av fakturaen fører til at ein overstig det maksimale sjablongbeløp, fører du opp dekning opp til sjablongbeløpet.
Type lønn eller yting
Før opp «utgiftsgodtgjersle» og «elektronisk kommunikasjon».
Trekkpliktig
Ytinga skal alltid førast opp som trekkpliktig.
Du kan late vere å gjennomføre forskotstrekk dersom trekkbeløpet er under minstegrensene for forskotstrekk.
For naturalytingar skal du gjennomføre forskotstrekket i dei kontante ytingane så langt dei rekkjer. Er det ikkje dekning for samla forskotstrekk i dei kontante ytingane, skal du melde frå skriftlig til Skatteetaten via Altinn.
Grunnlag for arbeidsgivaravgift
Du skal berekne arbeidsgivaravgift av denne ytinga.
Unnatak:
Du kan berre late vere å berekne arbeidsgivaravgift når inntektsmottakaren
- kjem inn under trygdelovgivinga i eit anna land i samsvar med ein sosialkonvensjon eller EØS-avtalen
- er ein utanlandsk arbeidstakar som ikkje er medlem av folketrygda og som arbeider på norsk kontinentalsokkel eller i norsk territorialfarvatn
Arbeidstakar har i nokre tilfelle stadfesting på at medlemskap blir halde aktivt hos eiga trygdestyresmakt (A1 eller annan blankett). NAV Medlemskap og avgift vurderer all dokumentasjon og registrerer eit eventuelt unntak frå medlemskap i folketrygda med periode, og om unntaket gjeld heile eller delar av folketrygda. Registrert unntak frå medlemskap i norsk folketrygd blir sendt elektronisk frå NAV til Skatteetaten.
Det er berre registrert unntak hos Skatteetaten som gir arbeidsgivar fritak frå å berekne arbeidsgivaravgift for arbeidstakar.
Skatteetaten kan fastsetje arbeidsgivaravgift for arbeidsgivar viss arbeidstakar ikkje er registrert med unntak og rapportert lønn eller yting ikkje inngår i avgiftspliktig grunnlag.
Arbeidsgivar eller den tilsette kan kontakte NAV for å spørje om unntak frå medlemskap i folketrygda er registrert.
Skatte- og avgiftsregel
Dersom inntektsmottakaren oppfyller vilkåra, skal du bruke skatte- og avgiftsreglane:
Skatte- og avgiftsregelen gjeld:
- inntektsmottakarar som kjem inn under Svalbardskattelova
Dersom inntektsmottakaren oppfyller vilkåra skal du markere lønn og andre ytingar med «Svalbard».
Du må òg markere forskotstrekk som høyrer til, med nemninga «Svalbard».
Sjå utfyllande informasjon om forskotstrekk i a-meldinga
Hugs óg å oppgi riktig nemning av frådraget når det er ei eiga frådragsnemning for Svalbard, sjå fagforeiningskontingent, premie til pensjonsordningar, premie til fond og trygd og brakkeleige.
Skatte- og avgiftsregelen gjeld:
- inntektsmottakarar som kjem inn under Jan Mayen-skattelova.
Dersom inntektsmottakaren oppfyller vilkåra skal du markere lønn og andre ytingar med «Jan Mayen og bilanda».
Du må òg markere forskotstrekk som høyrer til med «Jan Mayen og bilanda».
Sjå utfyllande informasjon om forskotstrekk i a-meldinga
Hugs óg å oppgi riktig nemning av frådraget når det er ei eiga frådragsnemning for Jan Mayen og bilanda, sjå fagforeiningskontingent og premie til pensjonsordningar.
Skatte- og avgiftsregelen gjeld:
- sjøfolk som har krav på eit eige frådrag (sjømannsfrådrag) i lønn og andre ytingar,
- når dei har tent opp dette ved å arbeide om bord på skip i fart.
Dersom inntektsmottakaren oppfyller vilkåra skal du markere lønn og andre ytingar med «særskilt frådrag for sjøfolk».
Sjå òg utfyllande informasjon om særskilt frådrag for sjøfolk
Dersom du sender a-melding for ein skattefri organisasjon, kan du bruke skatte- og avgiftsregelen:
Dersom du sender a-melding for ein skattefri organisasjon (skattefrie selskap, foreiningar og institusjonar som nemnt i skattelova § 2-32 første ledd), kan du markere lønna eller ytinga med "skattefri organisasjon".
Gjer du dette, treng du ikkje vurdere om inntektsmottakaren kjem til å passere grensa for opplysningsplikta på 10 000 kroner i løpet av året. Ein må då nytte markeringa frå første krone og for utbetalingar heile året.
Tilleggsinformasjon
Ingen tilleggsinformasjon.
Oppteningsperiode (frivillig)
Du kan oppgi oppteningsperiode for alle typar lønn og andre ytingar i a-meldinga. Både startdato og sluttdato for oppteningsperioden må vere innanfor same rapporteringsmånad.
Når skal du rapportere
Før opp ytinga den kalendermånaden godtgjersla blir betalt, uavhengig av kva for periode (og kva år) fakturaen gjeld.
Årleg inntektstillegg – sjablongbeløp
|
Gjeld per inntektsmottakar, og for ei eller fleire EK-tenester: |
|
| Faktisk dekt beløp avgrensa til | 4 392 kroner |
Du skal bere ta omsyn til ytingar frå deg, ikkje om personen har dekning frå fleire arbeidsgivarar.
Sjå òg Skatte-ABC om elektronisk kommunikasjon
Når sjablongbeløpet er nådd
Når det maksimale sjablongbeløpet (årleg inntektstillegg) er nådd for ein arbeidstakar, skal du ikkje rapportere meir for vedkomande. Dette gjeld sjølv om arbeidstakaren får dekt elektroniske kommunikasjonstenester seinare dette året.
Døme med elektronisk kommunikasjon som utgiftsgodtgjersle
Anna jobbar i eit IT-selskap og får dekt breiband gjennom utgiftsgodtgjersle. IT-selskapet refunderer kostnadene til breibandet etter kvart som ho leverer faktura.
Anna leverer fakturaer i mars, juni og oktober. Kvar faktura er på 1 500 kroner og blir dekt i den månaden dei blir leverte.
Dette fører IT-selskapet opp om EK-tenester for Anna:
A-melding for mars og juni:
- Breiband (utgiftsgodtgjersle)
1 500 kroner (faktisk beløp) for dekning av breiband
A-melding for oktober:
Denne månaden blir sjablongbeløpet overstige med 108 kroner.
- Breiband (utgiftsgodtgjersle)
392 kroner (1 500 - 108 kroner) for dekning av breiband
Dei siste 108 kronene av fakturaen som blir dekt, skal ikkje førast opp eller skal takast med i utrekningsgrunnlag for trekk. Det skal heller ikkje reknast ut arbeidsgivaravgift av beløpet.
Resten av året:
Resten av året skal dei ikkje føre opp dekning av EK-tenester, sjølv om Anna leverer fleire fakturaer eller byrjar å bruke IT-selskapet sin telefon som naturalyting. Det skal heller ikkje inngå i grunnlaget for trekk eller reknast ut arbeidsgivaravgift av.
Både naturalyting og utgiftsgodtgjersle
Dersom du dekkjer elektronisk kommunikasjon med ein kombinasjon av naturalyting og utgiftsgodtgjersle, må du føre opp desse kvar for seg, etter type yting.
Det vil seie at du skal føre opp:
- den delen som er ei utgiftsgodtgjersle her, som elektronisk kommunikasjon – utgiftsgodtgjersle»
- den delen som er ei naturalyting, som elektronisk kommunikasjon – naturalyting
I slike tilfelle er den skattepliktige fordelen etter sjablongregelen framleis avgrensa oppover til 4 392 kroner per år. Den skattepliktige fordelen utgjer 366 kroner per månad for naturalytinga, i tillegg til det beløpet som arbeidsgivaren dekkjer som utgiftsgodtgjersle. Når taket på 4 392 kroner er nådd, kjem all dekning av EK-tenester resten av inntektsåret til å vere unnateke skatteplikt.
Døme med både naturalyting og utgiftsgodtgjersle
William jobbar som kontormedarbeidar i eit advokatbyrå. Han får dekt mobiltelefon som ei naturalyting heile året og breiband gjennom utgiftsgodtgjersle. William leverer ein faktura på 1 500 kroner for breiband for mars og august.
Dette oppgir advokatbyrået om EK-tenester for William i løpet av året:
A-melding for januar og februar:
- Mobiltelefon (naturalyting)
366 kroner (4 392/12 månader = 366 kroner) for dekning av mobiltelefon
A-melding for mars:
- Mobiltelefon (naturalyting)
366 kroner (4 392/12 månader = 366 kroner) for dekning av mobiltelefon - Breiband (utgiftsgodtgjersle)
1 500 kroner (faktisk beløp) for dekning av breiband
Samla sett for mars inngår 1 866 kroner (366 + 1 500 kroner) i trekkgrunnlaget.
A-melding for april, mai, juni og juli:
- Mobiltelefon (naturalyting)
366 kroner (4 392/12 månader = 366 kroner) for dekning av mobiltelefon
A-melding for august:
I august står det att 330 kroner av sjablongbeløpet. Advokatbyrået fører då opp:
- Mobiltelefon (naturalyting)
330 kroner (beløpet som står att) for dekning av mobiltelefon
Det skal ikkje førast opp noko som utgiftsgodtgjersle.
Etter dette skal dei ikkje føre opp dekning av EK-tenester resten av året, sjølv om William får dekt EK-tenester ut året.
Fellesfakturerte tenester
Arbeidsgivar kan dekkje kostnader til fellesfakturerte tenester og tilleggstenester skattefritt med inntil 1 000 kroner i inntektsåret.
Det skattefrie beløpet blir fylt opp først. Du kan late all dekning av slike tenester inngå i det skattefrie beløpet utan å ta omsyn til kva som er tenestleg bruk, og kva som er privat bruk.
Dersom arbeidsgivar dekkjer meir enn beløpsgrensa, må du vurdere det overskytande beløpet og fastslå kva som er tenestleg og kva som er privat bruk. Den delen av det overskytande beløpet som er privat bruk, skal skattleggjast som lønn etter alminnelege reglar.
Dersom ein dekkjer kostnaden ved at arbeidstakaren leverer faktura, skal du føre opp den skattepliktige delen som kontantyting, anna.
Dersom dekninga gjeld for dekning ved naturalyting skal du føre opp den skattepliktige delen som naturalyting, uspesifisert.
Rette feil
| MAGNET_EDAG-114 Ugyldig verdi |
| MAGNET_EDAG-114B Ugyldig verdi for denne kalendermånaden |
| MAGNET_EDAG-200 Denne inntekta er rapportert med feil opplysningar og er ugyldig |
| MAGNET_EDAG-230B Ugyldig verdi |
| MAGNET_EDAG-243 Opplysningar om oppteningsperiode er ugyldig |
| MAGNET_EDAG-298 Denne inntekta er rapportert med feil opplysningar og er ugyldig |
Kva brukar vi opplysningane til
NAV brukar opplysningar om lønn og andre ytingar til å rekne ut dagpengar og kontrollere ytingar som sjukepengar, foreldrepengar, uføretrygd og bidragsforskot.
Skatteetaten brukar opplysningar om elektronisk kommunikasjon til å fylle ut skattemeldinga på førehand og til kontroll.
Statistisk sentralbyrå (SSB) brukar opplysningane til statistikkføremål.
Aktuelt regelverk
